Zabur 50 - Hodáay Pákén Ketáb Balochi zobáná

Hodá wat may dádras ent

Asápay Zabur.

¹ Hamá porwák, Hodáwandén Hodá habara kant o zeminá gwánka jant, cha ródarátká tán rónendá.

² Hodá cha Sahyuná ke zébáiay kamál ent, wati nurá drapshána kant.

³ May Hodá kayt o bétawára nabit, ér barókén ásé démá enti o trondén gwát o lurhé chágerdá.

⁴ Borzén ásmánán ham gwánka jant o zeminá ham, tánke wati mardománi dadrasiá bekant.

⁵ “Hodádóstán mani gwará yakjáh kanét, hamá ke gón korbánig kanagá, gón man ahdesh bastag.”

⁶ Ásmán áiay adl o rástiá jára janant, chiá ke Hodá wat dádras ent. Ósht...

⁷ “Oo mani mardomán! Beshkonét ke habara kanán. Oo Esráil! Tai helápá gwáhia dayán. Man Hodá án, shomay Hodá.

⁸ Pa korbánigi naent ke tará hakkala dayán, tai sóchagi korbánig modám mani chammáni démá ant.

⁹ Na cha tai lógá gwaské zurán o na pasé cha tai gwáshá.

¹⁰ Chiá ke jangalay sajjahén haywán manig ant, hazárán kóháni dalwat.

¹¹ Kóhestagáni sajjahén báli morgán jáha kárán o har ché ke zeminá gardit manig ent.

¹² Agan shodig atán tará sahigon nakortagat, chiá ke jahán o harché áiá hast, manig ant.

¹³ Gókáni góshtá warán? Pasáni hóná nóshán?

¹⁴ Wati shogrgozáriay korbánigá Hodáyá pésh kan o wati kawlá gón borzén arshay Hodáyá purah kan.

¹⁵ Sakki o sóriáni róchá maná belóth, man tará nejáta dayán o taw maná shán o shawkata dayay.”

¹⁶ Bale Hodá gón badkárá chosha gwashit: “Tará che hakk ent ke mani Sharyatay rahbandáni habará bekanay yá mani ahd o paymánay bárawá chizzé begwashay?

¹⁷ Chiá ke cha adab o tálimá bézár ay o mani habará poshtá dawra dayay.

¹⁸ Dozzé ke genday, démet róshena bit o gón zenákárán hamráha bay.

¹⁹ Dapay lagámá pa badiá yalaha kanay o zobáná pa prébá.

²⁰ Modám wati brátay helápá habara kanay, wati mátay chokkay sará bohtáma janay.

²¹ Taw é kár kortagant o man hecch nagwasht, hayálet kort ke man tai payméné án. Bale nun tará malámata kanán o tai mayár o gonáhán tai chammáni démá éra kanán.

²² “Oo Hodá shamoshtagénán! É habará neshán kanét, agan na, shomárá chondh chondha kanán o kas shomárá rakkénta nakant.

²³ Á kas ke shogrgozáriay korbánigá pésha kant hamá maná shán o shawkata dant, pa wat ráhé tayára kant o man áiá hamá nejátá pésha dárán ke cha mani némagá ent.”