Zabur 48 - Hodáay Pákén Ketáb Balochi zobáná

May Hodáay shahr

Kórahay chokkáni Zabur.

¹ Hodáwand mazan o satáay báz láhek ent, may Hodáay shahray tahá. Áiay pákén kóh,

² Sahyunay kóh, zébá gón wati borziá, sajjahén jahánay shádehi, shomálay borzterén bolandi, mazanshánén bádsháhay shahr ent.

³ Hodá áiay borján ent, watá mohrén kaláté pajjáréntagi.

⁴ Bádsháh yakjáh butant o hóriá démá shotant,

⁵ bale anchosh ke shahresh dist, hayrán o habakkah mantant o torsáná jestant.

⁶ Larzagesh delá kapt, dardé trondén chó ke janénéay chellag o zanká.

⁷ Taw gón ródarátki gwátá Tarshishay bandenay bójig próshtant.

⁸ Hamá dábá ke eshkotag nun gón wati chammána gendén, lashkaráni Hodáwanday shahray tahá, may Hodáay shahrá ke Hodá tán abad pádária kant. Ósht...

⁹ Oo Hodáwand! Tai parasteshgáhay tahá may johlánkén pegr o hayál gón tai mehrá ent.

¹⁰ Oo Hodá! Tai námay paymá, tai satá zeminay chárén kondhán sara bit. tai rástén dast adl o rástiá porr ent.

¹¹ Cha tai dadrasiá Yahudáay métag shádmán bátant o Sahyunay kóh shádán.

¹² Sahyuná zyárat kanét, áiay chágerdá begardét o borján hesáb kanét,

¹³ áiay mohrén diwáláni némagá sharriá hayál gwar dayét o sajjahén kalátáni bechárét, tánke gón nókén naslá begwashét

¹⁴ ke Hodá hamesh ent, may Hodá, abad tán abad, hamá ent ke tán marká may rahshóna bit.