Zabur 44 - Hodáay Pákén Ketáb Balochi zobáná

Oo Hodá! May madatá byá

Pa sázger o washáwázáni sálárá. Kórahay chokkáni shayri gwashtánk.

¹ Oo Hodá! Má wati góshán eshkotag, may pet o pirénán gwashtag ke áyáni zamánagá chónén káret kortag, gwastagén dawr o bárigán.

² Taw gón wati dastá kawm dar kortant, bale may pet o pirén sabz kortant. Kawmet droshtant o may pet o pirén sháhegáni bakshátant.

³ Na áyáni zahmáni zór at ke molkesh gept na ke básk o bázuán sóbén kortant. É tai rástén dast at, tai básk o chehragay rozhn, chiá ke áyáni sará mehrabán atay.

⁴ Oo Hodá! Taw mani bádsháh ay. Pa Ákubá péróziay hokmá borr.

⁵ Cha tai némagá ent ke dozhmenán pada kenzénén, cha tai námá ent ke orosh barókán lagatmála kanén.

⁶ Man wati kamánay sará tawkala nakanán o zahm maná sóbéna nakant.

⁷ É taw ay ke márá cha dozhmenán rakkéntag o badwáh sarjahl kortagant.

⁸ Oo Hodá! Má modám tai sará pahr kortag o tán abad tai námay shográ gerén. Ósht...

⁹ Bale nun taw márá dawr dátag o béezzat kortag, may lashkaray hamráha nabay.

¹⁰ Márá dozhmenáni démá pada kenzénay o badwáh márá áwára janant.

¹¹ Márá korbánigén pasáni paymá pa koshagá eshtaget o kawmáni nyámá sheng o sháng kortag.

¹² Taw wati kawm arzáná bahá kortag o cha áyáni baháyá sutté nabortag.

¹³ Márá hamsáhegáni rishkandi kortag o kerr o gwaray mardománi kalági.

¹⁴ Taw márá kawmáni nyámá thekk o neshán kortag, darkawm sará chandhénant o maskará kanant.

¹⁵ Sajjahén róchá gón sarjahliá dém pa dém án o sharmá mani dém póshetag,

¹⁶ cha bad o rad gwashókáni shegáná, cha dozhmen o bérgiray dastá.

¹⁷ É sajjahén may sará átkagant, bale angat má tará nashamoshtag o gón tai ahdá nárást nabutagén.

¹⁸ May del cha taw per natarretag o pád o gám cha tai ráhá dar nabutag.

¹⁹ Bale taw márá prósh dátag o gón wahshién haywánán yakjáh kortag, gón tahárterén tahárókiá póshéntag.

²⁰ Agan má wati Hodáay nám beshamoshtén, yá dast pa bigánagén hodáéá borz kortén,

²¹ Hodáyá nazántagat? Chiá ke á cha delay ráz o asrárán sarpad ent.

²² Bale má tai sawabá sajjahén róchá gón marká dém pa dém én o korbánigén pasáni paymá hesáb áraga bén.

²³ Oo Hodáwand! Ágáh bay. Pa ché wáb ay? Jáh jan o márá tán abad yalah makan.

²⁴ Chiá wati démá chéra dayay o pa ché may bazzagi o lagatmáliá shamóshay?

²⁵ Chiá ke má háká dém pa chér én o láp zeminá lacchetag.

²⁶ Pád á o may madatá byá, wati mehray sawabá márá bemók o berakkén.