Zabur 42 - Hodáay Pákén Ketáb Balochi zobáná

Zaburay domi ketáb Zabur 42—72 Oo mani arwáh! Chiá paréshán ay?

Pa sázger o washáwázáni sálárá. Kórahay chokkáni shayri gwashtánk.

¹ Áskay paymá ke pa kawray ápán zahirwár ent, hamé paymá, oo mani Hodá, mani arwáh tai zahirán ent.

² Mani arwáh pa Hodáyá tonnig ent, pa zend bakshókén Hodáyá, ke bárén kadi Hodáay bárgáhá rawán o áiay démá záhera bán?

³ Shap o róch warákon ars ent, Wahdé mardom modám maná gwashant: “Tai Hodá kojá ent?”

⁴ Wahdé wati delay dardán darshána kanán, hayálá kapán ke che paymá mazanén mocchiay hamráh atán, jashnay mazanén mocchiay o gón shádehiay kukkár o shogrgozáriay sawtán dém pa Hodáay lógá áyáni rahshón atán.

⁵ Oo mani arwáh! Chiá gimmortagay? Chiá mani del o daruná paréshán ay? Óst o omét Hodáay sará bekan, chiá ke nóksará hamáiá názénán, wati rakkénók o

⁶ wati Hodáyá. Mani daruná arwáh gimmortag paméshká tará cha Ordonay sardhagár o Hermónay kóhá yáta kanán, cha Misáray kóhá.

⁷ Tai mazanén ápsháráni grandá, johlánki, johlánkiá gwánka jant, tai sajjahén chawl o mawj, mani sará proshtagant.

⁸ Róchá, Hodáwand wati mehrá déma dant o shapá sawt o zémeli gón man ent, dwáé dém pa wati zend bakshókén Hodáyá.

⁹ Gón Hodáyá ke mani talár ent gwashán: “Chiá maná shamoshtaget? Chiá cha dozhmenay ázárá mótk byárán?”

¹⁰ Dozhmenáni shegánán, mani haddh hurt kortagant, chiá ke sajjahén róchá maná gwashant: “Tai Hodá kojá ent?”

¹¹ Oo mani arwáh! Chiá gimmortagay? Chiá mani del o daruná paréshán ay? Óst o omét Hodáay sará bekan, chiá ke nóksará hamáiá názénán, wati rakkénók o wati Hodáyá.