Zabur 40 - Hodáay Pákén Ketáb Balochi zobáná

Hodáwandá nókén sawté mani dapá dát

Pa sázger o washáwázáni sálárá. Dáuday Zabur.

¹ Gón sabré pa Hodáwandá wadáron kort, démi gón man tarrént o mani peryáti eshkot.

² Maná cha johlánkén kalléá dar áworti, cha gel o gandápá, mani pádi taláréay sará óshtárént o gámi mohr kortant.

³ Nókén sawté mani dapá dáti, may Hodáay satá o sanáay shayr. Bázéné gendit o mannit o Hodáwanday sará tawkala kant.

⁴ Bahtáwar hamá ent ke Hodáwanday sará tawkala kant o démá gón porkebrénána nakant, gón hamáyán ke drógén hodáyáni randgiriá gomráh ant.

⁵ Oo Hodáwand, oo mani Hodá! Taw pa má bázén ajabén kár o shawré kortag, hechkas tai matth buta nakant. Agan belóthán tai káráni bárawá jár bejanán o habar bekanán, haminchok báz ant ke cha hesábá dar ant.

⁶ Tará pa hayrát o korbánigá hájaté nést, bale mani góshet pach kortag, sóchagi korbánig o gonáháni korbániget nalóthetag.

⁷ Gorhá gwashton: “Man átkag o tayár án, mani bárawá ketábay tumárá nebisag butag.

⁸ Oo mani Hodá! Armánon tai lóth o wáhagay sarjam kanag ent, tai Sharyat mani delá ent.”

⁹ Rakkénag o nejátay wasshén hálon mazanén diwáná jár jatag. Oo Hodáwand! Hamá dhawlá ke taw zánay man wati dap lagám najatag.

¹⁰ Tai rakkénókén madaton wati delá chér nadátag, tai wapádári o nejátbakshiay bárawá habaron kortag o cha mazanén diwáná tai mehr o wapáon napóshéntag.

¹¹ Oo Hodáwand! Maná cha wati rahmatá zebahr makan, tai mehr o wapá tán abad maná émen bedárát.

¹² Chiá ke béhesábén sakkián maná angerr kortag, mayárbárián maná geptag o dista nakanán, cha mani saray mudán gésh ant, mani del kaptag.

¹³ Oo Hodáwand! Mehrabáni kan o maná berakkén. Hodáwandá! Zutt pa mani madatá byá.

¹⁴ Á sajjahén ke mani kóshay randá ant o mani marká lóthant sarjahl o sharmsár bátant, á ke mani syahróchiay padá ant poshtá berawát o roswá bátant.

¹⁵ Á ke mani sará “hah, haha” kanant wati sarjahliá hayrán o habakkah bátant.

¹⁶ Bale á ke tai shóházá ant sajjahén tai bárgáhá shádehi kanát o gal o bál bátant, á ke tai rakkénókén madatesh dóst ent, modám begwashátant: “Hodáwand maz‌an ent.”

¹⁷ Man garib o hájatmand án, Hodáwandá mani hayál gwar bát. Taw mani komak o rakkénók ay. Oo mani Hodá! Dér makan.