Zabur 4 - Hodáay Pákén Ketáb Balochi zobáná

Démá pa má rozhnág kan

Pa sázger o washáwázáni sálárá. Gón zehi o simmi sázán. Dáuday Zabur.

¹ Oo mani dádrasén Hodá! Passaw beday wahdé peryáta kanán. Sakki o sóriáni wahdá mani dast o bánzolet pach kortant. Maná mehr o rahmat baksh o dwáyánon gósh dár.

² Oo mardomán! Tán kadéná mani ezzat kamsharap kanaga bit? Tán chontá náhudagiá dósta dárét o drógay padá gardét? Ósht...

³ Bezánét ke Hodáwandá Hodádóst pa wat zortag o jetá kortagant. Wahdé Hodáwandá tawára kanán, á eshkont.

⁴ Hezhmay tahá gonáh makanét. Éshiay badalá, wapsagay wahdá, wati delá é bárawá pegr kanét o árám gerét. Ósht...

⁵ Barhakkén korbánig peshkash kanét o Hodáwanday sará tawkal.

⁶ Bázéné gwashit: “Kay ent pa má néki bekant?” Oo Hodáwand! Wati démá pa má rozhnág kan.

⁷ Taw mani del cha shádániá sarréch kortag, cha áyáni hamá wahday shádániá géshter ke dán o gallah o tázagén sharábesh báz bebant.

⁸ Árámiá drája kasshán o wáb ham kapán, chiá ke tahná taw, oo Hodáwand, maná émeniay tahá nendénay.