Zabur 39 - Hodáay Pákén Ketáb Balochi zobáná

Mani rócháni hesáb chi ent?

Pa sázger o washáwázáni sálárá. Pa Yedutuná. Dáuday Zabur.

¹ Gwashton ke “pahréza kanán tán gón wati zobáná gonáh makanán. Tán wahdé badkáré mani kerrá ent wati dapá lagáma kanán.”

² Chopp o bétawár bután, tantaná sharrén habaré ham nakorton, bale dard o andóhon géshter butant.

³ Delon mán daruná jósh janagá ent. Wahdé géshter pegrona kort, ásá shamálaha kasshet, gorhá zobánon pach but.

⁴ “Oo Hodáwand! Mani ákebatá paddar kan, mani rócháni hesáb chi ent, bell tán bezánán ke chón zutta gwazant.

⁵ Taw mani zend bechilléay kaddá kortag, mani zendmánay sál, tai chammá hecch naant. Saddak án ke ensánay zend yak sáhé gésh naent.” Ósht...

⁶ Béshakk ensán chó sáhegéá chakkarit, béshakk ke á mopt o náhudagá tach o tága kant, mocch o ambára kant, bale nazánt ke kayá rasant.

⁷ “Bale nun oo Hodáwand! Man che chizzay wadárá án? Ométon tai sará ent.

⁸ Maná cha sajjahén náparmánián chotthén o ahmakáni kalági makan.

⁹ Bétawár án o dapá pacha nakanán, chiá ke é taw kortag.

¹⁰ Wati zarbatá cha mani sará dur kan, ke cha tai shahmátá tostag o kaptagán.

¹¹ Taw pa hakkal ensáná cha gonáhá adaba dayay o áiay dósténán hamá paymá kanay ke raméz o waróka kant. Saddak án ke ensánay zend sáh o damé gésh naent. Ósht...

¹² “Oo Hodáwand! Mani dwáyá beshkon o pa komaká mani peryátay némagá delgósh kan, arsánon mashamósh o bétawár mabay. Chiá ke tai gwará mehmánéay paymá án, darámadé, wati pet o pirénáni dhawlá.

¹³ Wati gazabá cha man dur kan, tán cha jahánay yalah kanagá pésar padá gal bebán.”