Zabur 36 - Hodáay Pákén Ketáb Balochi zobáná

Hodáay mehr chenkadar porarzesh ent

Pa sázger o washáwázáni sálárá. Hodáwanday hezmatkár Dáuday Zabur.

¹ Gonáh, badkárá mán áiay delay johlánkiá gwánka jant, áiay chammán Hodátorsi nést.

² Chiá ke á wati jenday delá haminchok wati tawsipá kant, ke wati gonáhá nazánt o cha áiá naprat korta nakant.

³ Dapay habari badi o préb ent, cha aglmandi o nékkáriá dasti shoshtag.

⁴ Tantaná wati gandal o bestará pandala sázit, gonahkáriay ráhi geptag o badiá yalaha nakant.

⁵ Oo Hodáwand! Tai mehr arshá rasit o wapádári tán jambarán.

⁶ Tai adl o rásti borzterén kóháni dhawlá ent o ensáp, mazanén johlánkiáni. Oo Hodáwand! Taw ay ke ensán o haywánay rakkénók ay.

⁷ Oo Hodá! Tai mehr chenkadar porarzesh ent, bani ádam tai bánzoláni sáhegá panáha gipt.

⁸ Á cha tai bárgáhay sarréchén nyámatán séra bant o cha wati lezzatáni kawrá áyán sérápa kanay.

⁹ Chiá ke zendmánay sarchammag taw ay o cha tai nurá ent ke nura gendén.

¹⁰ Pa wati dóstdárán wati mehrá modám barjáh dár o adl o rástiá pa nékdelán.

¹¹ Porkebráni pád mani sará ér mabát, badkáráni dast maná sargardán makanát.

¹² Bechár badkár che paymá kaptagant, háká sarshakun o pád átka nakanant.