Zabur 35 - Hodáay Pákén Ketáb Balochi zobáná

Oo Hodáwand! Pa mani hakká jang kan

Dáuday Zabur.

¹ Oo Hodáwand! Gón hamáyán bemerh ke gón mana merhant o gón hamáyán jang kan ke gón man janga kanant.

² Wati kasán o mazanén esparán bezur o mani madatá jáh bejan.

³ Pa áyán ke mani randá kaptagant wati nayzahá chest kan o áyáni ráhá band. Mani arwáhá begwash: “Tai rakkénók man án!”

⁴ Á ke mani zenday tabáhiay randá ant, roswá o sharmendag bátant. á ke pa mani táwáná pandala jórhénant, poshtá bekenzát o pashal bátant.

⁵ Chosh ke pog o palár gwátay démá, Hodáwanday préshtag áyán betáchénát.

⁶ Ráhesh tahárók o lakoshánk bát o Hodáwanday préshtag áyáni padá bekapát,

⁷ chiá ke mopt o náhakká pa man dámesh chér gétkag o pa mani arwáhá kallesh kótkag.

⁸ Anágat tabáhi‌esh chakká kapát o wati chér gétkagén dámá kapátant, kapát o gár o gomsár bátant.

⁹ Gorhá mani arwáh Hodáwanday bárgáhá shádehia kant o pa wati rakkagá lezzata bárt.

¹⁰ Á wahdá har band o bógon gwánka jant: “Oo Hodáwand! Tai matth kay ent? Taw nézgárá cha zóráwarteréná rakkénay o nezór o hájatmandá cha pol o pánch kanóká.”

¹¹ Badwáh o bérahmén sháhed jáha janant o hamá mayárán maná laddhant ke cha áyán sahig naán.

¹² Nékiay badalá gón man badia kanant o mani arwáh gamig o porsig ent.

¹³ Bale wahdé á nádráh atant, man sugi god o póshák gwará kort o jesm o ján gón róchag dáragá ranjént. Wahdé mani dwá bépassaw mantant

¹⁴ gréwán bután, hamá dábá ke pa dóst yá brátéá gamiga bant, sar jahl o mótk árán bután, hamá dábá ke pa mátá zára janant.

¹⁵ Bale wahdé thagalon wárt past o lagór gón mazanén shádehié mocch butant, mani helápá wahdé man sahig naatán, á maná derrán atant o bassesha nakort.

¹⁶ Chó Hodánábáwarán, áyán wati maskará gésh kanána kort o pa man dantánesha drosht.

¹⁷ Oo Hodáwand! Tán kadéna nenday o cháray? Mani arwáhá cha áyáni setamá berakkén, mani yakkén zendá cha shéráni dapá.

¹⁸ Gorhá mazanén diwáná tai shográ gerán, mardománi mazanén mocchiá tará satá kanán.

¹⁹ Mayl ke prébkárén dozhmen mani sará shádehi kanant, mayl hamá ke mopt o náhakká cha man bézár ant chammok o pónzok bekanant.

²⁰ Chiá ke pa sohl o émeni habara nakanant, pa á mardomán ke molká árám o béják neshtagant pormakrén habar payma kanant.

²¹ Dapá pa man pacha réchant o gwashant: “Hah, hah, hah! Gón wati chammánen distag!”

²² Oo Hodáwand! Taw é distag, chopp o bétawár mabay. Hodáwandá! Cha man dur mabay.

²³ Ágáh bay o pa mani dádrasiá jáh bejan. Oo mani Hodá, oo mani Hodáwand! Pa mani hakká.

²⁴ Oo mani Hodáwandén Hodá! Pa wati adlaygi gonáhay bohtámá cha man thagalén, mayl á mani sará shádehi bekanant.

²⁵ Mayl wati delá begwashant: “Hah, hah, hah! Pa wati armáná rasetén.” Mayl begwashant: “Lonkahé kort o éren bort.”

²⁶ Harkas ke mani mosibatáni sará shádehia kant sharmendag o sarjahl bát, á ke watá cha man borztera kanant gón sharm o bésharapi póshénag bátant.

²⁷ Á ke wáhagesh mani bémayári ent shádmán bátant o shádehiay gwánká borz kanátant, modám begwashátant: “Hodáwand mazan ent ke cha wati hezmatkáray salámatiá gala bit.”

²⁸ Gorhá zobánon sajjahén róchá tai adlá gwánka jant, tai satá o sanáyá.