Zabur 32 - Hodáay Pákén Ketáb Balochi zobáná

Bahtáwar hamá ent ke gonáhi bakshag butagant

Dáuday shayri gwashtánk.

¹ Bahtáwar hamá ent ke Hodáwand cha áiay násharián sar gwastag o gonáhi bakshag butagant.

² Bahtáwar hamá ent ke Hodáwand áiay gonáhá hechbar hesába nayárit o áiay arwáhá prébé mán nést.

³ Wahdé chopp o bétawár atán haddh o bandon pussán atant, cha sajjahén róchay zári o peryátán.

⁴ Chiá ke róch o shap tai dast mani sará sangin at, sajjahén tágaton hoshagá at, chó ke garmágay taptay chérá bebán. Ósht...

⁵ Gorhá wati gonáhon tai dargáhá mannet o wati náparmániánon chér nadát. Gwashton: “Wati gonáh o sarkashián Hodáwanday gwará mannán” o taw mani gonáhay mayárbári bakshet. Ósht...

⁶ Paméshká, tán wahd o móh ent, har Hodádóst tai gwará dwá bekant, wahdé hárén áp chesta bant, hech paymá pa áiá sar buta nakanant.

⁷ Taw mani chér bayagay jágah ay, cha sakki o tangián maná émena dáray o gón ázátiay sawt o zémelán gwarambáza kanay. Ósht...

⁸ Hodáwanda gwashit: “Tará hamá ráhá sója dayán ke báyad ent beraway, tará shawr o saláha dayán o tará chárána bán.

⁹ Násarpadén asp yá kacharay paymá mabay, ke tahná gón lagám o mahárá rám kanaga bit, agan na, tai nazziká nayayt.”

¹⁰ Badkáray ranj o azáb báz ant, bale Hodáwanday mehr hamáiay chapp o chágerdá gipt ke Hodáwanday sará tawkala kant.

¹¹ Oo pahrézkárán! Hodáwanday bárgáhá shádehi kanét o shádán bebét. Oo sajjahén nékdelán! Shádehiay gwánká borz kanét.