Zabur 30 - Hodáay Pákén Ketáb Balochi zobáná

Mótkay badal nách o sohbat

Dáuday Zabur. Pa mazanén parasteshgáhay wapká sawté.

¹ Oo Hodáwand! Tará shán o shawkata dayán, chiá ke taw maná cha johlánkián chest kort o naeshtet dozhmen mani sará shádehi bekanant.

² Oo Hodáwand, mani Hodá! Tai gwará pa komaká peryáton kort o taw maná cha nájórhiá dráh kort,

³ mani arwáh cha mordagáni jaháná dar áwort o cha áyáni nyámá ke kall o kabr butant zendag kort.

⁴ Oo Hodáwanday dóstdárán! Pa Hodáwandá názénk bejanét, áiay pák o palgárén námay shográ begerét.

⁵ Chiá ke hezhmi damáné o mehr o rahmati omray drájiá. Bit ke sajjahén shapé pa gréwag begwazit, bale bámgwáhá shádehi wati chehragá záhera kant.

⁶ Man wati ásudagiay wahdá gwasht: “Hechbar larzénaga nabán.”

⁷ Oo Hodáwand! Taw maná cha wati mehr o rahmatá mohrén kóhéay paymá óshtáréntagat, bale wahdé wati démet cha man tarrént, torseton.

⁸ Oo Hodáwand! Tará tawáron jat, tai gwará zári o peryáton borz kort:

⁹ “Mani marká che sutté mán o kabray tahá mani ér rawagá chónén páedagé? Záná, hák tará satá dant? Jára jant ke taw wapádár ay?

¹⁰ Oo Hodáwand! Beshkon o mani sará mehrabán bay. Hodáwandá! Mani madat kanók bay.”

¹¹ Taw mani mótk nách o sohbaté kort, sugi god o póshák dar kort o maná gón shádmániá póshént,

¹² tánke mani arwáh tará satá bedant o bétawár mabit. Oo Hodáwand, mani Hodá! Tán abad tai shográ gerán.