Zabur 3 - Hodáay Pákén Ketáb Balochi zobáná

Oo Hodáwand! Pád á

Dáuday Zabur, hamá wahdá ke cha wati chokk Abshálumá jehagá at.

¹ Oo Hodáwand! Mani dozhmen chenkadar báz ant. Bázéné mani helápá pád áyagá ent.

² Bázéné mani bárawá gwashagá ent: “Hodá eshiá narakkénit.” Ósht...

³ Bale taw oo Hodáwand! Wat mani chágerdá espar ay, Mani shán o shawkat ay, maná sarperáza kanay.

⁴ Hodáwandon gón borzén tawáré peryáta kort o áiá cha wati pák o gechénién kóhá maná passaw dát. Ósht...

⁵ Man ásudag waptán o pád átkán, chiá ke Hodáwand mani posht o panáh at.

⁶ Cha lakkáni lakká natorsán ke cha har némagá maná angerresh kortag.

⁷ Oo Hodáwand! Pád á. Oo mani Hodá! Maná berakkén. Taw ay ke mani dozhmenáni démá shahmáta janay o badkáráni dap o dantánána próshay.

⁸ Rakkénók Hodáwand ent, tai barkat tai kawmá berasát! Ósht...