Zabur 28 - Hodáay Pákén Ketáb Balochi zobáná

Peryát

Dáuday Zabur.

¹ Oo Hodáwand, oo mani talár! Tará tawára kanán, cha man nádelgósh mabay. Agan taw bétawár bebay, hamáyáni paymá bán ke kall o kabrá kapant.

² Mani peryát o záriay tawárá gósh dár, wahdé cha taw madata lóthán o wati dastán dém pa tai pákén bárgáhá borza kanán.

³ Maná badkáráni hamráhiá gerrán makan o makassh, hamá ke radén kára kanant o gón hamsáhegán cha sohl o saláhá habará ant, bale delesh cha sherr o shórá porr ent.

⁴ Kortagén káráni mozzáesh beday, hamsang gón áyáni badén kárán, dastay kortagénáni mozzáesh beday, áyáni káráni kaddá.

⁵ Paméshká ke Hodáwanday káráni parwáhá nakanant, áiay dazhonaray káráni háterá nadárant, á eshán tabáha kant o hechbar pa rost o rodómá naylit.

⁶ Hodáwandá satá bát, chiá ke mani peryát o záriay tawári eshkotag.

⁷ Hodáwand mani zór o espar ent, delon áiay sará tawkala kant o madaton rasetag. Del cha shádmániá sarréch ent o gón wati sawt o názénkán áiay shográ gerán.

⁸ Hodáwand wati mardománi zór o twán ent, pa rógen per moshtagéná rakkagay kaláté.

⁹ Wati mardomán berakkén o wati kawmá barkat beday, áyáni shopánk bay o tán abad wati kópagá bejallesh.