Zabur 26 - Hodáay Pákén Ketáb Balochi zobáná

Oo Hodáwand! Wati dastán bégonáhiay tahá shódán

Dáuday Zabur.

¹ Oo Hodáwand! Gonáhay bohtámá cha mani sará bethagalén, chiá ke wati bémayáriay tahá gámon jatag o bé larzagé Hodáwanday sará tawkalon kortag.

² Hodáwandá! Maná bechakkás o ázmáesh kan, mani del o hayálá cha chakkásá begwázén.

³ Chiá ke tai mehr modám mani chammáni démá ent o tai wapádáriay sáhegá gáma janán.

⁴ Na gón prébkárán hamdiwána bán o na dotal o dopóstén mardománi hamráh.

⁵ Cha badkáráni hamráhiá naprata kanán o gón radkárán hamdiwána nabán.

⁶ Oo Hodáwand! Wati dastán bégonáhiay tahá shódán o tai korbánjáhay sará chahra warán,

⁷ tán wati shogrgozáriay tawárá borz kanán o tai sajjahén ajabén káráni kessahá byárán.

⁸ Oo Hodáwand! Maná tai lóg sakk dóst ent, tai shán o shawkatay jágah.

⁹ Mani sáhá gonahkáráni hórigá mager o zendá gón hónigán,

¹⁰ ke gandahén pandalesh dastá ent o rástén dastesh cha reshwatá sarréch.

¹¹ Bale man wati bémayáriay tahá gáma janán, maná berakkén o mani sará rahm kan.

¹² Pádon tachk o sápén jágahé ér ent, mazanén diwánán Hodáwandá názénán.