Zabur 24 - Hodáay Pákén Ketáb Balochi zobáná

Mazanshánén bádsháh

Dáuday Zabur.

¹ Zemin o áiay sajjahén hasti Hodáwandayg ant, jahán o sajjahén mahluk.

² Chiá ke Hodáwandá áiay bonyát mán daryáyá nádént o ápáni sará óshtárént.

³ Kay cha Hodáwanday kóhá borzád shota kant? Kay áiay pákén jágahá óshtáta kant?

⁴ Hamá ke deli sáp o dasti pák ent, hamá ke wati arwáhá dém pa náhudagiá natarrénit o drógén sawgenda nawárt.

⁵ Á cha Hodáwandá barkata gipt o cha wati rakkénókén Hodáyá, adl o ensáp.

⁶ Hamé paymá ant, á mardom ke Ákubay Hodáay shóházá ant, hamá ke pa áiay démá hodónák ant. Ósht...

⁷ Oo darwázagán! Wati sará borz bedárét. Oo kwahnén dar o dapigán! Watá pa sháhegáni pach kanét, tánke mazani o shánay bádsháh begwazit.

⁸ Mazani o shánay é bádsháh kay ent? Porwák o zóráwarén Hodáwand, Hodáwand ke jangá delér ent.

⁹ Oo darwázagán! Wati sará borz bedárét! Oo kwahnén dar o dapigán! Watá pa sháhegáni pach kanét, tánke mazani o shánay bádsháh begwazit.

¹⁰ Mazani o shánay é bádsháh kay ent? Lashkaráni Hodáwand hamá ent mazani o shánay bádsháh. Ósht...