Zabur 23 - Hodáay Pákén Ketáb Balochi zobáná

Hodáwand mani shopánk ent

Dáuday Zabur.

¹ Hodáwand mani shopánk ent, hech chizzay mohtája nabán.

² Maná sarsabzén charágáhána wápénit o pa árámén ápán sara kant.

³ Mani arwáhá tázaga kant o pa wati námaygi pahrézkáriay ráhán maná démá bárt.

⁴ Agan cha markay tahárterén shép o daragán ham begwazán cha hech bimm o baláhá natorsán, chiá ke taw gón man gón ay, tai latth o asá maná tasallá bakshit.

⁵ Dozhmenáni chammáni démá parzónagé pa man pacha kanay, pa sharapa dayagá mani saragá théla janay o mani jámá modám porr kanán ay.

⁶ Allamá, mehr o néki zenday sajjahén róchán mani pad o randá ant o Hodáwanday kalátá jahmenenda bán, tán abad.