Zabur 22 - Hodáay Pákén Ketáb Balochi zobáná

Taw chiá maná tahná esht?

Pa sázger o washáwázáni sálárá. Dáuday Zabur. “Sahargáhi áskay” tarzay sará.

¹ Oo mani Hodá, oo mani Hodá! Taw chiá maná tahná esht? Pa ché cha mani rakkénagá dur ay, cha mani áh o peryátán sakk jetá ay.

² Oo mani Hodá! Sajjahén róchá peryáta kanán o taw passawé nadayay, sajjahén shapá ham, bale áráma nagerán.

³ Angat ham taw pák o palgár ay, Bani Esráil tará názénit ke taw pa bádsháhi neshtagay.

⁴ May petán tai sará tawkal kort, tai sará tawkalesh kort o taw rakkéntant.

⁵ Tai dargáhá peryátesh kort o rakketant, tai sará tawkalesh kort o pashal o sharmendag nabutant.

⁶ Záná, man ensáné naán, kermé án? Mardománi démá sobakk án o kawmay chammá béezzat.

⁷ Harkas ke maná gendit kalág o rishkand kant. Dapá chótha kanant, sará sorénant o gwashant:

⁸ “Angat wati óst o ométá pa Hodáyá band, bell á tará berakkénit, berakkénit agan tará dósta dárit.”

⁹ Bale taw maná cha mátay lápá dar áwort o mátay sénagá ásudagi dát.

¹⁰ Cha pédáeshá tai baddhá dawr dayag bután, cha mátay lápá mani Hodá butagay.

¹¹ Cha man dur mabay, chiá ke sakki o sóri nazzik ent o kassé pa komaká nést.

¹² Bázén narén gókéá mani chapp o chágerd geptag, Báshánay sardhagáray zóráwarén gókán maná angerr kortag,

¹³ wati práhén dapesh pa man parroptag, gorrók o derrókén shéráni paymá.

¹⁴ Chó ke ápá réchag o tálán butagán sajjahén haddhon cha bandán dar átkagant. Delon chó ke mómá áp ent o sénagá sóchit.

¹⁵ Zór o tágaton kunzagi chondhé ke hoshk butag o zobánon nokká lacchetag, maná markay háká wápéntaget.

¹⁶ Kochekán mani chapp o chágerd geptag, sherr o badkáráni rombá angerr án, mani dast o pádesh thong thong kortagant,

¹⁷ wati sajjahén haddhán shomár korta kanán. Áyán wati thélag pa man sakk kortagant,

¹⁸ mani pocchán wati nyámá bahra kanant o jámagay sará pála janant.

¹⁹ Bale taw, oo Hodáwand! Dur mabay. Oo mani zór o tawkal! Pa mani komaká eshtáp kan.

²⁰ Mani arwáhá cha zahm o shamshirá berakkén o mani zendagiá cha kochekáni zolm o zórákiá.

²¹ Maná cha shér o mazáráni dapá neját beday, ke taw maná cha wahshién káigaráni kánthán rakkéntag.

²² Tai námá pa wati brátán jára janán o mocchiay nyámá tará názénán.

²³ Shomá, oo Hodátorsán! Áiá benázénét. Oo Ákubay sajjahén chokk o óbádagán! Áiá ezzat o shán bedayét. Oo Esráilay padréchán! Áiay haybatá bechárét.

²⁴ Chiá ke áiá cha setam distagénay bazzagiá posht nakortag o démi cha áiá natarréntag. Peryáti ke kortag áiá eshkotagant.

²⁵ Mazanén diwáná mani satá o saná pa taw ent, wati kawlán hamáyáni démá sarjama kanán ke Hodátors ant.

²⁶ Békebr o darbésh waráka warant o séra bant o á ke Hodáyá shóháza kanant áiá názénant. shomay del tán abad zendag bát.

²⁷ Zeminay chárén kondh áiá yáta kanant o dém pa Hodáwandá pera tarrant, sajjahén kawmáni hándán o kothom áiay bárgáhá sará jahla kanant.

²⁸ Chiá ke bádsháhi Hodáwandayg ent o hamá ent ke kawmáni sará hákemia kant.

²⁹ Zeminay sajjahén zóráwar waráka warant o áiay démá kapant, hákién ensán kóndhána kapit, hamá ke watá, wat zendag dáshta nakant.

³⁰ Áyókén nasl áiay hezmatá bant, démi padréch Hodáwanday bárawá sahig kanaga bant o

³¹ pa áyán ke angat wadi nabutagant áiay adl o ensápá jára janant. Gwashant: “Á hamá at ke é kári kort.”