Zabur 21 - Hodáay Pákén Ketáb Balochi zobáná

Hodáay dátagén sóbay shogriá

Pa sázger o washáwázáni sálárá. Dáuday Zabur.

¹ Oo Hodáwand! Bádsháh cha tai zórá shádmánia kant o cha tai rakkénagá ent ke inchok gal o bál ent.

² Taw áiay delay morád bakshátagant o áiay lontháni wáhaget cha áiá dur nadáshtagant. Ósht...

³ Chiá ke gón bázén barkatáni dayagá pa áiay wasshátká dar átkagay o tájé cha asilén teláhá sará dátet.

⁴ Áiá cha taw zend lóthet o taw bakshát, rócháni dráji, abad tán abad.

⁵ Cha tai bakshátagén kámránián, áiay shán o marháh mazan ent, áiárá shawkat o mazani dátag.

⁶ Pa rásti abadmánén barkat bakshátag o wati bagalá gal o shadánet kortag.

⁷ Chiá ke bádsháh Hodáwanday sará tawkala kant o borzén arshay Hodáwanday mehrá nalarzit.

⁸ Tai dast, sajjahén dozhmenán dara géjit, tai rástén dast pa áyán ke cha taw naprata kanant rasit.

⁹ Á wahdi ke záhera bay áyán porácheshén tarunéay paymá kanay. Hodáwand wati hezhmay tahá áyán éra bárt o áiay áchesh áyána wárt.

¹⁰ Áyáni padréchá cha zeminá gár o bégwáha kanay, chokk o nabiragánesh cha mardománi nyámá.

¹¹ Harchont ke tai helápá palitén shawrbandi bekanant o badén repk o pandal besázant bale sóbéna nabant,

¹² chiá ke taw áyána táchénay, wahdé ke wati kamáná dém pa áyána tarrénay.

¹³ Oo Hodáwand! Gón wati zór o twáná anchosh maz‌anshán bátay. Tai wák o kodratá satá kanén o názénén.