Zabur 19 - Hodáay Pákén Ketáb Balochi zobáná

Hodáwanday Sharyat tamán o béayb ent

Pa sázger o washáwázáni sálárá. Dáuday Zabur.

¹ Ásmán Hodáwanday shán o mazaniá paddara kant, borzén arsh áiay dastay kárán.

² É róch pa á róchá habar rawána kant o é shap pa á shapá zánt o hekmat darshána kant,

³ na habaré o na gálé, áyáni tawár eshkonaga nabit.

⁴ Padá ham áwázesh sarjamén zeminá sheng o tálána bit o habaresh tán jahánay goddhi marz o simsarána rasant. Pa róchá, Hodáyá ásmáná tambué bastag,

⁵ róch sálónkéay paymá cha wati kellahbandá dara kayt o chó ke pahlawáné shádán maydána kant.

⁶ Cha ásmánay yak gwaréá dara kayt o tán á dega gwará chahra wárt, hech chizzé cha áiay horm o garmiá chér naent.

⁷ Hodáwanday Sharyat tamán o béayb ent o jesm o jáná bóda kárit. Hodáwanday hokm porehtebár ant o kamzántán dáná o aglmand kant.

⁸ Hodáwanday rahband rást ant o delá shádána kanant. Hodáwanday parmán pák ant o chammán rozhnága kanant.

⁹ Hodáwanday tors pák ent o tán abad páydár. Hodáwanday parmán barhakk ant o sarjamiá adl,

¹⁰ cha teláhá delkashter, tantaná cha asilén zarr ham, cha shahdá shirkenter, tantaná cha bénagay kodámay har trampá washter.

¹¹ Tai hezmatkárá cha áyán dháh o hoshdár rasit o gón áyáni dáragá mazanén mozzé.

¹² Kay ent á ke wati radián bezánt o sarpad bebit? Maná cha wati nazántagén gonáhán pák o sallah kan.

¹³ Wati hezmatkárá cha gorunák o porkebrén kár o kerdán bedár, mayl ke mani sará báládast bebant. Hamá wahdá tamán o béayba bán o cha har mazanén gonáhá pák.

¹⁴ Oo Hodáwand! Mani dapay habar o delay pegr o hayál tai delá benendátant, taw ke mani talár o posht o panáh ay.