Zabur 17 - Hodáay Pákén Ketáb Balochi zobáná

Tai bánzoláni chérá

Dáuday dwá.

¹ Oo Hodáwand! Mani barhakkén peryátán beshkon o nálagánon gósh dár, dwáyánon beshkon, ke cha béryáén dap o lonthán dara káyant.

² Cha tai bárgáhá maná dádrasi o ázáti sar bát, chammet rásténá begendátant.

³ Taw mani del ázmáesh kortag o shappásán mani cháragá átkagay, maná chakkásetaget o hech dar nagétkag, ahdon kortag ke dap gonáh makant.

⁴ Mardománi kár har ché ke bit, bale man cha tai lontháni gálá watá cha zálemáni ráhá dur dáshtag.

⁵ Mani pádáni pad tai ráhá naksh ant, pádon nalarzetagant.

⁶ Oo Hodá! Tará lóthán, chiá ke taw maná passawa dayay, gósh dár o habaránon beshkon.

⁷ Wati mehray ajabbatiá pésh bedár! Taw hamáyána rakkénay ke cha wati dozhmenán tai gwará mayár o báhótha bant.

⁸ Maná chó wati chammá besambál o wati bánzoláni sáhegá chér beday,

⁹ cha á badkárán ke maná gár o gomsára kanant o cha hamá jawrén dozhmenán ke maná angerresh kortag.

¹⁰ Á wati sengén delán mohra kanant o áyáni zobán porkebr o gorunákén habara kant.

¹¹ Mani padesh geptagant o hamé annun maná angerresh kortag, chammesh pa man dótkag tán zeminá dawron bedayant.

¹² Á shéréay paymá ant ke pa shekárá shodig ent, warnáén shéréay paymá ke kaminá neshtag,

¹³ Oo Hodáwand! Jáh jan, esháni démá dar á o zeminá bejanesh, gón wati zahmá maná cha badkárán berakkén.

¹⁴ Hodáwandá! Maná cha é paymén mardománi dastá ázát kan, cha é donyáay mardomán ke nasibesh tahná hamé donyá ent o bass, ke lápánesh cha wati hazánagá séra kanay, chokkesh báza bant o áyáni pasht kaptagén chizz pa chokkánesha rasit.

¹⁵ Bale man pa pahrézkári tai démá gendán, ágáh ke bán, cha tai gendagá séra bán.