Zabur 148 - Hodáay Pákén Ketáb Balochi zobáná

Hodáwanday shán cha zemin o ásmáná borzter ent

¹ Hodáwandá benázénét, Halléluyá. Cha ásmánán Hodáwandá benázénét, borzén jágahán áiá satá kanét.

² Oo áiay sajjahén préshtagán! Áiá satá kanét. Oo áiay sajjahén ásmáni lashkarán! Áiá satá kanét.

³ Oo máh! Oo róch! Áiá satá kanét. Oo sajjahén drapshnákén estárán! Áiá satá kanét.

⁴ Oo borzén arsh! Áiá satá kan. Oo ásmánay sarboray ápán! Áiá satá kanét.

⁵ É sajjahén, Hodáwanday námá satá bekanátant, chéá ke cha hamáiay hokmá jórh butagant.

⁶ Hamáiá é sajjahén, abad tán abad barjáh dáshtagant o anchén hokmé dáti ke hechbar dawr dayag o nákár kanaga nabit.

⁷ Hodáwandá cha zeminá satá kanét, shomá oo sajjahén daryái sahdárán o zeray sajjahén johlánkián,

⁸ oo gerók o tróngal, barp o jambarán, oo tupánén gwátán ke hamáiay hokmá barjáha dárét,

⁹ oo kóh o sajjahén jompán, oo nibagi drachk o sajjahén gazzán,

¹⁰ oo rastar o sajjahén dalwatán, oo kasánén jánwar o báli morgán,

¹¹ oo zeminay bádsháh o sajjahén kawmán, oo zeminay shahzádag o sajjahén hákemán,

¹² oo warnáén mardén o janénán, oo pirénán, gón chokkán yakjáh!

¹³ É sajjahén, Hodáwanday námá satá bekanátant, chéá ke tahná hamáiay nám mazanshán ent, hamáiay shán o shawkat cha zemin o ásmáná borzádter ent.

¹⁴ Áiá kánthé pa wati kawmá borz kortag, áiay sajjahén wapádárén hezmatkáráni satá, Esráilay satá, kawmé ke gón áiay delá nazzikk ent. Hodáwandá benázénét, Halléluyá.