Zabur 147 - Hodáay Pákén Ketáb Balochi zobáná

Hodáwand proshtadelán dráha kant

¹ Hodáwandá benázénét, Halléluyá, may Hodáay názénag chón wassh ent o áiay satá kanag delkassh.

² Hodáwand Urshalimá cha nóksará addha kant o Esráilay darándhéhán yakjáha kant.

³ Proshtadelán dráha kant o thappánesha bandit.

⁴ Estárán hesába kant o har yakkéá pa nám tawára kant.

⁵ May Hodáwand mazan ent, zóri békesás, áiay zánt o zánagá kadd o kesás nést.

⁶ Hodáwand békebrán komaka kant, bale badkárán zeminá dawra dant.

⁷ Hodáwandá gón shogrgozári benázénét, pa may Hodáyá soróz o chang bejanét.

⁸ Á, ásmáná gón jambara póshénit o zeminá hawra bakshit o kóháni sará sabzaga ródénit.

⁹ Á, haywánán waráka dant o gwarágán ham, wahdé peryáta kanant.

¹⁰ Á, aspáni zórá gala nabit o na ke jangóláni pádán.

¹¹ Hodáwand hamáyáni sará wassha bit ke cha áiá torsant o sajjahén óst o ométesh gón áiay mehrá ent.

¹² Oo Urshalim! Hodáwandá satá kan, Oo Sahyun! Hodáwandá benázén.

¹³ Hamá tai darwázagáni karhián mohra dárit o tai diwáláni tahá, tai chokkán barkata dant.

¹⁴ Tai marz o simsarán émena kant o tará cha gehterén gandomá sérlápa kant.

¹⁵ Wati hokmá zeminá ráha dant o áiay habar téziá shenga bit.

¹⁶ Barpá chó pazhmá shenga kant o nódá poray paymá shánka dant.

¹⁷ Tróngalá nánay hurdagáni paymá éra dant, kay áiay barpén sártiay démá óshtáta kant?

¹⁸ Wati habará ráha dant o har chizz ápa bit, wati gwátá déma dant o ápa rombant o tachant.

¹⁹ Wati habará pa Ákubá áshkára kant o wati hokm o parmáná pa Esráilá.

²⁰ É kári pa dega hecch kawméá nakort o é dega kawm áiay rahbandána nazánant. Hodáwandá benázénét, Halléluyá.