Zabur 146 - Hodáay Pákén Ketáb Balochi zobáná

Hodáwand bandigán ázáta kant

¹ Hodáwandá benázénét, Halléluyá. Oo mani arwáh! Hodáwandá benázén.

² Tán zendag án Hodáwandá satá kanán tánke hastán wati Hodáyá názénán.

³ Shahzádagáni sará tawkal makanét, mardománi sará, ke rakkénta nakanant.

⁴ Arwáhesh ke dara kayt, zeminá pera tarrant o hamá róchá áyáni sajjahén shawr o hayál gár o zawála bant.

⁵ Bahtáwar hamá ent Ákubay Hodá áiay komakk ent, hamá ke ométi wati Hodáwandén Hodáay sará ent,

⁶ hamáiay sará ke zemin o ásmánay jórh kanók ent o daryá o har ché ke daryáyá hast, hamáiay sará ke tán abad wapádár ent,

⁷ zolm distagénáni dadrasiá kant o shodigán waráka dant. Hodáwand bandigán ázáta kant,

⁸ Hodáwand kóráni chammán pacha kant, Hodáwand hamáyán chesta kant ke lagatmál ant, Hodáwand pahrézkárán dósta dárit,

⁹ Hodáwand darámadáni negahpániá kant o chóraw o janózámáni hayálá dárit, bale badkáráni ráhá chapp o chótha kant.

¹⁰ Hodáwand tán abad bádsháhia kant, tai Hodá, oo Sahyun, nasláni nasl. Hodáwandá benázénét, Halléluyá.