Zabur 145 - Hodáay Pákén Ketáb Balochi zobáná

Hodáwand mazan ent

Satá o saná. Dáuday Zabur.

¹ Tai shán o shawkatá názénán, oo mani Hodá! Oo bádsháh! Tai námá satá kanán, abad tán abad.

² Tará har rócha názénán o tai námá satá kanán, abad tán abad.

³ Hodáwand mazan ent o satáay báz láhek, kass áiay mazaniá kadd o kesás korta nakant.

⁴ Naslé pa domi naslá tai káráni satáyá kant o tai mazanén káráni kessahána kárit.

⁵ Man tai mazanén shán o shawkatay sará pegra kanán, tai bákamálén káráni sará.

⁶ Tai bákamálén káráni zóráwari hamok zobánay sará ent o man tai mazanén káráni járá janán.

⁷ Tai mazanén sharriáni kessahána kárant o tai adlay sawtá janant.

⁸ Hodáwand mehrabán o rahm kanók ent, hezhm geragá déra kant o mehri báz ent.

⁹ Hodáwand gón sajjahénán nék ent o wati sajjahén addh kortagénáni sará rahma kant.

¹⁰ Oo Hodáwand! Tai dastay hamok kár tai shográ gipt, tai wapádár tará názénant.

¹¹ Tai bádsháhiay shán o shawkatay habará kanant o tai zóray mesálána dayant,

¹² tánke sajjahén baniádam tai zóráwarén kárán jár bejanant, tai bádsháhiay shán o shawkatá.

¹³ Tai bádsháhi abadi bádsháhié o tai hákemi nasláni nasl barjáha mánit.

¹⁴ Harkas ke kapit, Hodáwand áiá dárit o harkas ke lagatmál ent, Hodáwand áiá chesta kant.

¹⁵ Sajjahénáni chamm pa taw sakk ant o taw áyáni rózigá pa wahda bakshay.

¹⁶ Taw wati dastá pacha kanay o har zendagénay wáhagán puraha kanay.

¹⁷ Hodáwand wati hamok ráhá ádel ent, wati sajjahén kárán wapádár.

¹⁸ Harkas ke Hodáwandá tawára kant, Hodáwand áiay nazzikká ent, harkas ke pa del o setk áiá tawára kant.

¹⁹ Harkasá ke Hodáay tors delá ent, Hodá áiay wáhagán puraha kant o áiay peryátán gósha dárit o rakkéniti.

²⁰ Hodáwand wati sajjahén dóst dárókáni negahpán ent o sajjahén badkárán tabáha kant.

²¹ Mani dap Hodáwandá názénit, sajjahén sahdár áiay pákén námá satá bedayátant, abad tán abad.