Zabur 144 - Hodáay Pákén Ketáb Balochi zobáná

Hodá may sangar ent

Dáuday Zabur.

¹ Hodáwandá satá bát, mani talárá, ke mani dastán pa jangá dara kárit o mani lankokán pa merhagá.

² Hamá mani mehr kanókén Hodá o kalát ent, mani sangar ent o mani rakkénók, mani espar, ke áiay mayára bán, ke mani kawmá mani chérdasta kant.

³ Hodáwand! Ensán chié ke taw áiá mán byáray, bani ádám chié ke taw áiay hayálá bedáray?

⁴ Ensánay zend chó damkasshéá ent o róchi chó gwazókén sáhegéá.

⁵ Hodáwand! Ásmáná derr o jahlád byá, kóhán dast jan ke cha eshán dutt dar byayt.

⁶ Wati gerókán sheng kan ke dozhmen sheng o sháng bebant, wati tirán shán o sargardánesh kan.

⁷ Dastá cha borzád shahár, maná ázát kan o berakkén cha bázén ápán, cha darámadáni dastán,

⁸ ke dapesh cha drógá porr ant o rástén dastesh cha prébá.

⁹ Man pa taw nókén sawté janán, oo Hodá! Dahtárén soróz o changay sará pa taw sáza janán,

¹⁰ pa hamáiá ke bádsháhán sóbéna kant o wati hezmatkárén Dáudá rakkénit, cha koshókén zahmá.

¹¹ Maná berakkén o cha darámadáni dastá ázát kan, ke dapesh cha drógá porr ant o rástén dastesh cha prébá.

¹² Gorhá may bachakk, warnáiá chó rostagén drachká bant o may jenekk chó washtráshtagén menoká ke pa kalátán tráshag butagant.

¹³ May ambár, cha har paymén bar o samará porra bant o may ramag hazáráni hesábá gésha bant, dahán hazáráni hesábá, may dhagárán.

¹⁴ May áposén gók báz báz chokka kárant o dozhmen may diwálán próshta nakanant, kass bandiga nabit o may bázárán nálag o peryáta namacchit.

¹⁵ Bahtáwar hamá mardom ant ke hamé dhawlá bant, bahtáwar hamá ant ke Hodáwand áyáni Hodá ent.