Zabur 142 - Hodáay Pákén Ketáb Balochi zobáná

Maná cha kaydá dar kan

Dáuday shayri gwashtánk, hamá wahdá ke gáray tahá at. Dwáé.

¹ Hodáay bárgáhá zár o peryáta kanán o cha Hodáwandá rahma lóthán.

² Wati gelagán hamáiay bárgáhá kanán o wati sakki o sórián hamáiá gwashán.

³ Arwáh ke mani bátená béwára bit, taw ay ke mani ráhay rahshón ay. Hamá ráhá ke mana rawán pa man dámé chéresh gétkag.

⁴ Mani rástén némagá bechár, kass nést ke mani hayálá bebit. Maná panáh nést o kass mani zenday pegrá naent.

⁵ Oo Hodáwand! Tai bárgáhá peryáta kanán o gwashán: “taw mani panáhjáh ay o zendagénáni zeminá mani bahr.”

⁶ Mani peryátá gósh dár ke man mazanén sakki o sórián kaptagán. Maná cha á mardomán berakkén ke mani randá kaptagant, chéá ke cha man zórákter ant.

⁷ Maná cha kaydá dar kan ke tai námá benázénán. Gorhá pahrézkár mani chapp o chágerdá moccha bant ke taw pa man nékia kanay.