Zabur 141 - Hodáay Pákén Ketáb Balochi zobáná

Mani delá mayl ke dém pa badkáriá berawt

Dáuday Zabur

¹ Oo Hodáwand! Tará tawára kanán, zutt pa man byá. Wahdé tará tawára kanán, mani tawárá gósh dár.

² Mani dwá tai bárgáhá chó sóchokiá kabul bát o mani chest butagén dast, bégáhay korbánigay paymá.

³ Hodáwand! Pa mani dapá negahpáné bedár o mani lontháni darwázagay dapá páspáni bekan.

⁴ Mani delá mayl ke dém pa badkáriá berawt o man badkáráni hamráhiá sellén kárán gón bebán, maná áyáni washtámén chizzáni waragá mayl.

⁵ Bell maná pahrézkáré shahmát bejant, é rahmé, bell maná hakkal bedant, é pa mani sará rógené, man cha eshiá enkára nakanán, angat mani dwá, badkáráni káráni helápá bit.

⁶ Esháni hákem, cha talárán jahlád dawr dayaga bant, gorhá zánant ke mani habar sharr o rást ant.

⁷ Gwashant: “Anchosh ke yakké zeminá nangára kant o derrit, may haddh, mordagáni jahánay dapá sheng o sháng butagant.”

⁸ Bale mani chamm tará sakk ant, Hodáwand, oo Hodáwand! Tai mayára bán, maná markay dastá maday.

⁹ Maná cha hamá dámá berakkén ke badkárán chér gétkag, cha áyáni talká.

¹⁰ Badkár wat, wati dámán kapátant o man pa salámati begwazátán.