Zabur 140 - Hodáay Pákén Ketáb Balochi zobáná

Maná cha badkárán berakkén

Pa sázger o washalhánáni sálárá. Dáuday Zabur.

¹ Hodáwand! Maná cha badkárán pahréz o cha hezhmnákán berakkén,

² cha hamáyán ke wati delá badén pandala sázant o har róch jangé páda kanant.

³ Wati zobáná chó márá téza kanant o garrmáray zahresh lontháni chérá ent. Ósht...

⁴ Hodáwand! Maná cha badkáráni dastá dur bedár o cha hezhmnákán berakkén ke pa mani pádán dám sázagá ant.

⁵ Gorunákán pa man dám chér gétkag, dámi chammag. Mani ráhá talkesh chér kortag. Ósht...

⁶ Gón Hodáwandá gwashán: “Taw mani Hodá ay.” Mani peryát o záriá gósh dár, oo Hodáwand!

⁷ Oo Hodáwand, mani mohkamén Hodáwand o rakkénók! Jangay róchá taw mani saray negahpáni kort.

⁸ Hodáwand! Badkáráni armánán purah makan, wahdé orosha kanant áyáni pandalán sóbén bayagá mayl. Ósht...

⁹ Áyán ke maná angerr kortag, áyáni lontháni badi, áyáni jenday sará bekápát.

¹⁰ Rókén eshkaresh sará berechát, ásá dawr dayag bátant o pujgelén kaddhán boddhátant o hechbar dar átk makanátant.

¹¹ Pléndh may sardhagárá ábád mabátant, hezhmnákáni sará baláhé kapát.

¹² Mana zánán ke Hodáwand pa bazzagán dadrasi o pa hájatmandán adl o ensápa kant.

¹³ Pahrézkár zalur tai námay shográ gerant o nékdel tai bárgáhá jahmenenda bant.