Zabur 14 - Hodáay Pákén Ketáb Balochi zobáná

Nádána gwashit: “Hodáé nést”

Pa sázger o washáwázáni sálárá. Dáuday Zabur.

¹ Nádán wati delá gwashit: “Hodáé nést.” É palit ant o káresh sell o gandah, nékkáré nést.

² Hodáwand cha ásmáná bani ádamá chárit tán begendit bárén dánáé hast ke Hodáay shóházá ent.

³ Sajjahénán wati ráh gár dátag, hórigá palit butagant, nékkáré nést, yakké ham nést.

⁴ Badkár hechbar sarpada nabant? É mani kawmá anchosha warant ke mardom nagana warant o Hodáwandá hech tawára nakanant.

⁵ Bale ódá wati torsay tahá boddhant, chiá ke Hodá gón pahrézkáráni nasl o padréchá ent.

⁶ Shomá setam distagénáni shawrbandián rishkanda kanét, bale Hodá esháni panáhgáh ent.

⁷ Kasé cha Sahyuná byáyát o Esráilá berakkénát. Wahdé Hodáwand washbahtiá pa wati kawmá pera tarrénit, Ákub gal o bála bit o Esráil shádehia kant.