Zabur 138 - Hodáay Pákén Ketáb Balochi zobáná

Hodáwanday shográ gerén

Dáuday zabur.

¹ Oo Hodáwand! Cha delay johlánkiá tai shográ gerán, hodáyáni bárgáhá tará pa sawta názénán.

² Dém pa tai pákén parasteshgáhá kóndhána kapán o tai námá názénán pa tai mehr o wapádáriá ke taw wati nám o wati mohrén ahd o karár cha sajjahén chizán géshter mazani bakshátag.

³ Har wahdá ke tará gwánkon jatag taw maná passaw dátag, mani del mazan kortag o maná zór o wák bakshátag.

⁴ Hodáwand! Jahánay sajjahén bádsháh tai shográ begerátant, hamá wahdá ke tai habará eshkonant.

⁵ Tai káráni satáyá sawt bejanátant, ke Hodáwanday shán mazan ent.

⁶ Harchont ke Hodáwand mazanshán ent, bale békebrán pa rahma chárit o gorunákán cha durá pajjáha kárit.

⁷ Harchont ke sakki o sóriáni tahá gardán, bale taw maná zendaga dáray. Taw mani dozhmenáni hezhmay helápá wati dastá shaháray o gón wati rástén dastá maná rakkénay.

⁸ Hodáwand maná rakkénit. Hodáwand! Tai mehr abadmán ent, wati dastáni kárán band makan.