Zabur 137 - Hodáay Pákén Ketáb Balochi zobáná

Hodáwanday sawtán chón jata kanén?

¹ Bábelay kawráni kashá, má nesht o grét, wahdé má Sahyun yát kort.

² Má drachkáni sará wati soróz o chang dratkant,

³ ke may bandig kanókán márá gwasht: “Sawt bejanét,” ke may ázár dayókán cha má shádehiay sawt lóthet. Gwashtesh: “Pa má cha Sahyunay sawtán yakké bejanét.”

⁴ Má ke darándhéh én, Hodáwanday sawtán chón jata kanén?

⁵ Oo Urshalim! Agan man tará shamosht, mani rástén dast wati honará beshamóshát.

⁶ Mani zobán nokká belecchát agan tará yát makanán o agan Urshalimá wati masterén shádehi sarpad mabán.

⁷ Oo Hodáwand! Yátá bedár ke Urshalimay kapagay róchá Edumián ché kort. “Próshéti” áyán gwasht, “cha boná próshéti.”

⁸ Oo Bábelay jenekk! Taw zutt dém pa tabáhiá raway, bahtáwar hamá ent ke tará sezá dant, hamá chizzáni sezáyá ke taw gón má kortagant.

⁹ Bahtáwar hamá ent ke tai chokkána zurit o taláráni sará jant.