Zabur 132 - Hodáay Pákén Ketáb Balochi zobáná

Hodáwandá Sahyun gechén kortag

Dém pa Urshalimá borzád rawagay sawté.

¹ Oo Hodáwand! Dáudá yát kan o áiay sakki o sórián.

² Gón Hodáwandá sawgendé wárti o gón Ákubay zórmandén Hodáyá kawli kort o gwashti:

^3-5 “Tánke pa wati Hodáwand, pa Ákubay zorákén Hodáyá lógé addh makanán, wati jenday lógá narawán, watá árám kanagá naylán, chammán nazza nayárán, mecháchán dhokkagá naylán.”

⁶ Bechár, má Eprátahay shahrá ahd o karáray pétiay zegr eshkot o Jáháray sardhagárá dar gétk.

⁷ “Byáét áiay lógá rawén o áiay pádáni padagay démá sojdaha kanén o gwashén:

⁸ ‘Hodáwand! Jáh jan o wati ásudagiay jágahá byá gón wati zóray ahd o karáray pétiá.

⁹ Tai dini péshwáyán pahrézkáriay póshák gwará bát o tai wapádárén hezmatkár shádehiay kukkár bekanátant.”’

¹⁰ Pa wati hezmatkár Dáudá bechár o wati “rógen per moshtagéná” dawr maday.

¹¹ Hodáwandá gón Dáudá sawgendé wárt, kawlé korti o cha wati zobáná nabajjit, ke: “Man cha tai óbádagán yakké tai bádsháhi tahtá nádénán.

¹² Agan tai chokk, mani ahd o karáray sará bóshtant o mani hamá rahbandáni randgiriá bekanant ke manesh sója dayán, gorhá tai óbádag, tai bádsháhi tahtá nendant, tán abad.”

¹³ Chéá ke Hodáwandá Sahyun dar chetag o pa wati menendjáhá dósti butag, gwashtagi:

¹⁴ “É mani árámjáh ent, tán abad. Man hamedá wati bádsháhi tahtá nendán chéá ke dóstona bit.

¹⁵ Man eshiá barkata dayán o ábáda kanán, eshiay garibán lápséra kanán.

¹⁶ Man eshiay dini péshwáyán rakkagay pósháká gwará dayán o eshiay wapádárén mardom pa shádehi kukkára kanant.

¹⁷ Man edá pa Dáudá kánthé ródénán o pa wati “rógen per moshtagéná” cherágé róka kanán.

¹⁸ Eshiay dozhmenán, sharmsáriay pósháká gwará dayán o eshiay sar gón drapshókén tájéá borza bit.”