Zabur 13 - Hodáay Pákén Ketáb Balochi zobáná

Oo Hodáwand! Tán kadén?

Pa sázger o washáwázáni sálárá. Dáuday Zabur.

¹ Oo Hodáwand! Tán kadén? Bárén maná tán abada shamóshay? Tán kadén wati démá cha man panáha kanay o póshénay?

² Tán kadén mani pegr o andéshag maná ázár bedayant, har róch delon gamig? Tán kadén dozhmen mani sará báládast bebit?

³ Oo Hodáwand! Mani Hodá! Mani cháragá bekan o passaw day! Chammánon rozhná kan, agan na, markay wábá wapsán.

⁴ Chó mabit dozhmen begwashit: “Man áiay sará sóbén butagán”, badwáh shádán bebit ke mana larzán.

⁵ Bale tai mehray sará tawkala kanán, delon gal o bála bit ke taw maná rakkéntag.

⁶ Hodáwandá názénán, ke modám mani sará mehrabán butag.