Zabur 125 - Hodáay Pákén Ketáb Balochi zobáná

Hodáwandá wati kawmay chapp o chágerd geptag

Dém pa Urshalimá borzád rawagay sawté.

¹ Á ke Hodáwanday sará tawkala kanant Sahyunay kóhay paymá ant ke sorénaga nabit o tán abad barjáh mánit.

² Anchosh ke kóhán, Urshalim chapp o chágerd kortag, Hodáwandá wati kawmay chapp o chágerd geptag, annun o tán abad.

³ Badkárén bádsháhéay asá pahrézkáráni mirásay sará hokmrána nabit ke pahrézkár wati dastá pa badkári sell makanant.

⁴ Oo Hodáwand! Pa nékdelán néki kan pa hamáyán ke delesh rást o tachk ant.

⁵ Bale hamá mardom ke chapp o chóthén ráhána rawant, Hodáwand áyán gón badkárán yakjáha gallénit. Esráil émen o salámat bát.