Zabur 12 - Hodáay Pákén Ketáb Balochi zobáná

Hodádósté pasht nakaptag

Pa sázger o washáwázáni sálárá. “Sheminitay” tarzay sará. Dáuday Zabur.

¹ Oo Hodáwand! Berakkén, chiá ke hech Hodádósté pasht nakaptag o wapádár cha mardománi nyámá gár o bégwáh butagant.

² Harkas gón hamsáhegá dróga bandit, cháplusén dapesh pa préb habara kanant.

³ Hodáwand har cháplusén dapá próshát o har bathák janókén zobáná borrát.

⁴ Gwashant: “Má gón wati zobáná kámyáb o sóbéna bén, may dap o lonth ham gón má ant, may wájah o master kay ent?”

⁵ Hodáwanda gwashit: “Cha nezórén mardománi lagatmáli o hájatmandáni nálagáni sawabá nun jáha janán. Man eshán hamá paymá émenia bakshán ke esháni armán ent.”

⁶ Hodáwanday habar asil o béayb ant, nograhay paymá ke cha kurahá dar átkag o hapt randá pák o sallah kanag butag.

⁷ Oo Hodáwand! Taw eshán negahpánia kanay, taw é dábén mardománi nyámá esháni posht o panáha bay.

⁸ Badkár har némagá tarr o tába kanant, á wahdi ke mardom palitiá ezzata dayant.