Zabur 115 - Hodáay Pákén Ketáb Balochi zobáná

May Hodá arshá ent

¹ Márá enna, oo Hodáwand! Márá enna, tai námá shán o shawkat berasát, tai mehr o wapádáriay sawabá.

² Á dega kawm chéá begwashant: “Esháni Hodá kojá ent?”

³ May Hodá arshá ent, harché ke áiá wassha bit, hamá kárá kant.

⁴ Áyáni “hodá” nograh o teláh ant, ensánay dastay jórh kortagén bot.

⁵ Eshán dap per bale habar korta nakanant, chammesh per bale dista nakanant,

⁶ góshesh per bale eshkota nakanant, pónzesh per bale bó cheta nakanant,

⁷ dastesh per bale máreta nakanant, pádesh per bale ráh shota nakanant, na cha wati gotthá áwázé kassheta kanant.

⁸ Harkas ke eshán jórha kant, hamesháni paymá bit o hamá mardom ham ke esháni sará tawkala kant.

⁹ Oo Esráil! Hodáwanday sará tawkal kan, hamá shomay komakk o espar ent.

¹⁰ Oo Hárunay lóg! Hodáwanday sará tawkal kan, hamá shomay komakk o espar ent.

¹¹ Oo Hodátorsán! Hodáwanday sará tawkal kanét, hamá shomay komakk o espar ent.

¹² Hodáwandá márá yát kortag o márá barkata dant, Esráilay lógá barkata dant, Hárunay lógá barkata dant.

¹³ Hamáyán barkata dant ke Hodáwanday tors áyáni delá ent, mazanén o kasánénán, yakk paymá.

¹⁴ Hodáwand shomárá géshá cha géshter kanát, shomay jend o chokk, doénán.

¹⁵ Hodáwand shomárá barkat dayát, zemin o ásmánay addh kanók.

¹⁶ Borzén arsh Hodáwandayg ent o zemini baniádamárá dátag.

¹⁷ Mordag Hodáwandá nanázénant, na á mardom ke rawant o bétawára bant.

¹⁸ É má én ke Hodáwandá satá dayén, annun tán abad. Hodáwandá benázénét, Halléluyá.