Zabur 112 - Hodáay Pákén Ketáb Balochi zobáná

Hodádóstáni bahtáwari

¹ Hodáwandá benázénét, Halléluyá. Bahtáwar ent hamá ke Hodáwanday tors áiay delá ent, hamá ke áiay hokmi sakk báz dósta bant.

² Áiay nasl o óbádag zeminay sará porzóra bant, barkat nékdeláni padréchá rasit.

³ Áiay lóg cha mál o melkatá porra bit o áiay pahrézkári tán abad barjama mánit.

⁴ Pa nékdelán mán tahárókiá ham rozhna drapshénit, á mehrabán, rahm kanók o ádel ent.

⁵ Bakshendah o wámdehén mardomay ásar sharra bit, hamá ke wati kárán pa ensápa kant.

⁶ Chéá ke á hechbar larzénaga nabit, pahrézkárén mardomé tán abad yát kanaga bit.

⁷ Á cha badén hálána natorsit, deli jam ent, tawkali Hodáwanday sará ent.

⁸ Áiay del mohr ent, natorsit, néth wati dozhmenáni shekastá gendit.

⁹ Gón garib o nézgárán béhesáb bakshendah ent, áiay pahrézkári tán abad barjam ent. Áiay kánth pa sháné borz kanaga bit.

¹⁰ Badkára gendit o hezhmnáka bit, cha zahrá dantána droshit o ápa bit, badkáray wáhag námoráda bant.