Zabur 111 - Hodáay Pákén Ketáb Balochi zobáná

Hodáwanday kár rást o pa adl ant

¹ Hodáwandá benázénét, Halléluyá. Cha delay johlánkiá Hodáwanday shográ gerán, nékdeláni diwáná, mocchiay nyámá.

² Hodáwanday kár mazan ant, harkasay delá ke neshtagant, áyáni sará pa sharri pegra kanant.

³ Áiay kár shándár o porshawkat ant o áiay adl tán abad barjama mánit.

⁴ Áiá wati bákamálén kár yádgár kortagant, Hodáwand mehrabán o rahm kanók ent.

⁵ Á hamáyán waráka dant ke áiay torsesh delá ent, wati ahd o karárá tán abad yáta kant.

⁶ Wati káráni zóri wati kawmárá pésh dáshtag, darkawmáni mirási wati kawmárá dátagant.

⁷ Áiay dastáni kár rást o pa adl ant o sajjahén rahbandi porehtebár.

⁸ Abad tán abad mohr o mohkam ant, pa rásti o tachki kanag butagant.

⁹ Áiá wati kawm móketag, tán abad wati ahd o karári barjam dáshtag. Áiay nám pák o bákamál ent.

¹⁰ Hodáwanday tors dánáiay bendát ent. Hamá ke áiay rahbandáni randgiriá kanant, áyán sharrén zántkária rasit. Tán abad satá hamáiayg ent.