Zabur 102 - Hodáay Pákén Ketáb Balochi zobáná

Sahyuná Hodáwanday námá jár bejanant

Setam distagén mardoméay dwá, hamá wahdá ke wat ájez ent o wati peryátá Hodáwanday bárgáhá sara kant.

¹ Oo Hodáwand! Mani dwáyá gósh dár, mani peryát tará sar bát.

² Mani sakki o sóriay róchá wati démá cha man chér maday. Wati delgóshá gón man kan, wahdé tará tawára kanán, zutt passaw beday.

³ Chéá ke mani róch chó duttá gára bant o haddh chó rókén eshkará sochant.

⁴ Mani del chó mortagén káhá gimmortag o hoshk tarretag o cha ward o waráká kaptagán.

⁵ Cha bázén nálag o peryátá hoshkén haddh o pósté án.

⁶ Gyábáni bumméay paymá án, anchó ke bummé mán wayránagán.

⁷ Béwáb gandaláni tahá tachk án, anchó ke tahnáén morgé lógéay sará.

⁸ Dozhmen sajjahén róchá maná shegána janant, kalága bandant o nálata kanant.

⁹ Chéá ke nánay badalá pora warán o harché ke nóshán, arsá porr ant,

¹⁰ cha tai hezhm o gazabá, chéá ke taw maná chest kort o zeminá jat.

¹¹ Mani róch, bégáhi sáhegéay paymá gára bant o man káhay dhawlá hoshk bayagá án.

¹² Bale taw, oo Hodáwand, tán abad wati bádsháhi tahtá neshtagay o tai nám nasláni nasl barjáh ent.

¹³ Taw jáha janay o tará Sahyunay sará bazzaga bit, chéá ke Sahyunay sará rahm kanagay wahd átkag, á gisshetagén wahd rasetag.

¹⁴ Chéá ke tai hezmatkárán é shahray seng dóst ant o Sahyunay hákay sará ham bazzagesha bit.

¹⁵ Kawm cha Hodáwanday námá torsant o zeminay sajjahén bádsháh cha tai mazani o sháná.

¹⁶ Chéá ke Hodáwand Sahyuná nóksará addha kant o mán wati shán o shawkatá záhera bit.

¹⁷ Á bazzagáni dwáyán gósha dárit o cha áyáni peryátán nádelgósha nabit.

¹⁸ Bell ke é pa áyókén nasléá nebisag bebit o anchén kawmé ke angat addh nabutag, Hodáwandá satá o saná bekant.

¹⁹ Áiá cha wati pákén arshá jahlád cháretag, Hodáwandá cha ásmáná dém pa zeminá cháretag,

²⁰ tánke bandigáni nálagán beshkont o hamáyán ázát bekant ke markay sezá dayag butagant,

²¹ ke Sahyuná Hodáwanday námá jár bejanant o Urshalimá áiay satáyá bekanant,

²² hamá wahdá ke kawm o bádsháhi pa Hodáwanday parasteshá yakjáh moccha bant.

²³ Ráhay némá mani twáni prósht o mani róchi gwandh kortant.

²⁴ Gorhá man gwasht: “Oo Hodáwand! Omray nyámá mani zendá pach mager, tai sál tán sajjahén naslán barjáh ant.

²⁵ Zemin, taw cha azalá jórh kortag o ásmán tai dastáni kár ent.

²⁶ É sajjahén gár o bégwáha bant bale taw mánay, é sajjahén chó pósháká kwahna bant, taw eshán chó pósháká badala kanay o é bérána bant,

²⁷ bale taw mánay o tai sál halása nabant.

²⁸ Tai hezmatkáráni chokk tai bárgáhá jahmenenda bant o áyáni poshpad tai dargáhá barjáha mánant.”