Zabur 10 - Hodáay Pákén Ketáb Balochi zobáná

Chiá watá chéra dayay?

¹ Oo Hodáwand! Pa ché dur óshtátagay? Chiá watá sakkén sáhatán chéra dayay?

² Badkár gón kebr nezórénán shekára kant, bell ke wati pandaláni dámá gereptár bebit.

³ Chiá ke badkárá wati delay wáhagáni sará pahr ent, lálech kanókán barkata dant o Hodáwandá bad o rada gwashit.

⁴ Badkár mán wati kebr o gorunákiá gwashit: “Hodá dar gétka nakant”, áiay sajjahén pegr o hayál esh ent ke “Hodáé nést”.

⁵ Wati ráhá modám kámyáb o sóbén ent, tai shawr o dádrasi cha áiay chammá dur ant, wati sajjahén dozhmenán rishkanda kant.

⁶ Wati delá gwashit: “Hechbar cha wati jáhá sorénag o jombénaga nabán nasláni nasl cha kazá o baláhán dura bán.”

⁷ Dap o zobáni cha nálat o préb o setamá porr ent, áiay zobánay chérá petnah o sherkáriá kodám bastag.

⁸ Métag o ábádiáni kaminá nendit, chér o panáhén jáhán bégonáhána koshit, chérokái béwasáni shekár kanagay shóházá ent.

⁹ Shéray paymá wati kaminá wadára kant, wadára kant o nezór o nátwánán wati panjagá kárit, panjagá kárit o dámá dawra dant.

¹⁰ Áiay shekár, lagatmál o zár o wára bant, áiay dastá gár o gomsára bant.

¹¹ Wati delá gwashit: “Hodáyá shamoshtag démi póshéntag o hechbara nagendit.”

¹² Oo Hodáwand! Pád á. Oo Hodá! Wati dastá shahár. Bazzagénán mashamósh.

¹³ Badkár pa ché Hodáyá bad o rada gwashit? Chiá wati delá gwashit: “Hodá dar gétka nakant”?

¹⁴ Bale albat taw genday. Sakki o sóriána genday, tán kár o ehtiárá wati dastá bedáray. Bazzag o béchárag watá tai sepordaga kanant, chórawáni madat kanók taw ay.

¹⁵ Sherr o badkáráni báská beprósh, áyáni sharáratay hesábá beger, hamá káráni hesábá ham ke áiá gwashtag: “Hodá dar gétka nakant”.

¹⁶ Hodáwand abad tán abad bádsháh ent, kawm cha áiay sardhagárá gár o gomsára bant.

¹⁷ Oo Hodáwand! Taw bazzagáni wáhagán gósha dáray, áyán delbaddhia dayay o habaránesh eshkonay.

¹⁸ Chóraw o setam distagénáni dadrasiá kanay tánke é hákién ensán dega baré tors o dehshat maperrénit.