Pulosay kágad pa Rumián 9 - Hodáay Pákén Ketáb Balochi zobáná

Hodái gechén

¹ Man cha Masihay arwáh o jabiná rásta gwashán o dróga nabandán, mani del o darun cha Pákén Ruhá é habaray sháhediá dant ke

² maná sóznákén andóh o modámén dardé delá ent.

³ Drécha wati hamrag o hamzátén brátáni háterá, man nálat kanag buténán o cha Masihá besesténán.

⁴ Á, Esráili ant ke pa chokki zurag butagant. Shán o shawkat, ahd o paymán, Sharyatay rasag, parasteshay ráh o rahband o Hodáay labz o karár hamáyánig ant.

⁵ Bonpirok hamáyánig ant o Masih ham ke sajjahénáni Hodá ent, jesmi hesábá cha hamáyáni nasl o padréchá ent. Áiá modám satá o saná bát. Anchosh bát. Ámin.

⁶ Chosh naent ke Hodáay habará prósh wártag. Chéá ke har Bani Esráilié, Esráili naent.

⁷ Ebráhémay har chokk o nomásagé áiay rástén óbádag naent. Bale “tai nasl o padréch cha Esáká hesáb áraga bit.”

⁸ É chizz pésha dárit ke Hodáay chokk á naant ke jesmi chokk ant. Wádah dátagén chokk Ebráhémay nasl o padréch hesáb áraga bant.

⁹ Parchá ke wádah o karár chosh at: “Gisshéntagén wahdá pera tarrán o Sárahá mardénchokké bit.”

¹⁰ Tahná esh naat, gón Rebekkáyá ham hamé paymén chizzé but, wahdé á pa wati járhén chokkán lápporr but. Áyáni pet ham hamá yakkén at, bezán may bonpirok Esák.

^11-12 Bale cha eshiá pésar ke chokk pédá bebant o néki yá badi bekanant, Rebekkáyá gwashag but ke “masterén kasterénay hezmatá kant.” É dhawlá but tán Hodáay erádah cha gechénkáriá barjáh dárag bebit, bale cha kár o kerday ráhá na, cha hamáiay ráhá ke ensáná gwánka jant.

¹³ Anchosh ke nebisag butag: “Ákub maná dóst at o cha Issuá napraton kort.”

¹⁴ Gorhá ché begwashén? Hodá náensáp ent? Hechbar!

¹⁵ Chéá ke gón Mussáyá gwashit: “Agan belóthán gón yakkéá mehrabán bebán, gón áiá mehrabána bán o agan belóthán kaséay sará rahm bekanán, áiay sará rahma kanán.”

¹⁶ Bezán, é ensánay wáhag o was kanagay sará nabit, rahm kanag Hodáay dastá ent.

¹⁷ Parchá ke Pákén Ketáb gón Perawná gwashit: “Man tará pa é maksadá mazani dátag ke cha taw wati zór o wáká pésh bedárán tánke mani nám sajjahén zeminá jár janag bebit.”

¹⁸ Gorhá bezán, Hodá harkasay sará ke belóthit rahma kant o harkasay delá ke belóthit senga kant.

Hodáay kahr o rahmat

¹⁹ Cha man josta kanay: “Gorhá Hodá chéá angat márá éra jant? Áiay erádahay démá kay óshtáta kant?”

²⁰ Bale, oo ensán! Pa rásti taw kay ay ke gón Hodáyá yakk o do bekanay? É sharrén habaré ke addh kortagéné wati addh kanóká begwashit: “Chéá maná é paymá addhet kortag?”

²¹ Kuzahgará é hakk nést ke cha gelay yakkén chanká darpé pa alkápén o darpé pa ancháén káréá addh bekant?

²² Gorhá ché? Harchont Hodáyá wati kahr o gazab pésh dárag o wati wák o kodrat paddar kanag lóthet, bale angat áiay ehtiárá at, gón mazanén ópáré á mardomán besaggit ke kahr o gazabay chérá atant o gár o gomsár bayagay láhek.

²³ Gorhá ché? Balkén áiá chosh kortag tán wati shán o shawkatá hamá mardomán pésh bedárit ke áiay rahmatay chérá ant, hamá mardom ke Hodáyá pésará pa shán o shawkatá tayár kortagant.

²⁴ Má ham ke Hodáay gwánk jatagén én é rahmatay chérá én, tahná cha Yahudiáni nyámá gwánk jang nabutagén, cha darkawmáni nyámá ham gwánk jang butagén.

²⁵ Anchosh ke Hushá Nabiay Ketába gwashit: “Hamá ke mani kawm naat, man áiá wati kawma gwashán, hamá ke mani dordánag naat man áiá wati dordánaga gwashán.”

²⁶ Anchosh ham: “Hamá jágahá ke gón áyán gwashag but: ‘Shomá mani kawm naét,’ ódá á, zendagén Hodáay chokk gwashaga bant.”

²⁷ Esráilay bárawá Eshayá nabi jára jant o gwashit: “Bell ke Bani Esráilay chokk, daryáay rékáni kesásá báz bebant, bale cha áyán tahná yakk kasánén pasht kaptagén bahré rakkit.

²⁸ Chéá ke Hodáwand zeminay sará wati shawr o hokmá pa tézi o mohkami barjáha kant.”

²⁹ Hamá paymá ke Eshayá nabiá péshgóyi kortag: “Agan lashkaráni Hodáwandá pa má nasl o padréch maeshtén, gorhá má ham Sodumay mardománi paymá butagatén o may ásar ham Gomurahay mardománi ásar at.”

Esráilay nábáwari

³⁰ Nun ché begwashén? Hamá darkawm ke pa páki o palgáriá johdesh nakort, páki o palgári‌esh raset, hamá páki o palgári ke cha báwará kayt.

³¹ Bale Esráilián ke cha Sharyatay ráhá pa páki o palgáriá johd kort, cha Sharyatay ráhá pa páki o palgáriá narasetant.

³² Parchá chosh but? Paméshká ke áyáni johd, báwaray sará naat, kár o kerday sará at. Áyán mán gisshénókén sengay sará thagal wárt.

³³ Anchosh ke nebeshtah ent: “Man Sahyuná sengé éra kanán ke mardomána thagalénit, taláré ke áyán dawra dant, harkas ke áiay sará báwar bekant pashal o sharmendaga nabit.”