Pédáesh 3 - Hodáay Pákén Ketáb Balochi zobáná

Gonáh o sezá

¹ Már cha Hodáwandén Hodáay jórh kortagén á dega wakshién haywánán thagter o chálákter at. Áiá gón janéná gwasht: “É rást ent ke Hodáyá gwashtag bágay hecch drachkay bará mawarét?”

² Janéná gwasht: “Má bágay drachkáni bar o samarán wárta kanén,

³ bale Hodáyá gwashtag ke hamá drachkay bará mawarét ke bágay nyámá ent. Áiá dast ham per makanét. Agan na, merét.”

⁴ Márá gwasht: “Shomá pakká namerét.

⁵ Bale Hodá zánt, hamá róchá ke shomá á drachkay bará warét, shomay chamm pacha bant, shomá Hodáay paymá bét o nék o badá zánét.”

⁶ Nun janéná cháret ke á drachkay bar gwashay pa waragá wassh o gendagá zébá ent o pa zántkár bayagá delwáh. Gorhá áiá cha drachkay barán zort o wárt o wati mardárá ham dáti, ke hamráh ati. Mardá ham wárt.

⁷ Nun doénáni chamm pach butant o zántesh ke má jándar én. Cha enjiray tákán pa wat póshákesh dótk.

⁸ Gwátá ke sar kort, áyán Hodáwandén Hodáay pádbramsh eshkot ke bágá gám janagá at. Mard o áiay janá, watá bágay drachkáni poshtá cha Hodáwandén Hodáyá chér dát.

⁹ Hodáwandén Hodáyá mard gwánk jat o gwasht: “Kojá ay?”

¹⁰ Áiá passaw dát: “Man bágá tai pádbramsh eshkot o maná torset chéá ke jándar atán, paméshká man watá chér dát.”

¹¹ Hodáyá gwasht: “Kayá tará gwasht ke taw jándar ay? Taw hamá drachkay bar wártag ke man tará gwashtag mawari?”

¹² Mardá gwasht: “Hamá janén ke taw maná dátag, hamáiá á drachkay bar maná dát o man wárt.”

¹³ Gorhá Hodáwandén Hodáyá gón janéná gwasht: “É che káré ke taw kort?” Janéná gwasht: “Márá maná rad dát o man wárt.”

¹⁴ Hodáwandén Hodáyá gón márá gwasht: “Taw ke é kár kortag, nun taw sajjahén dalwat o sajjahén wakshién haywánáni nyámá masterén nálati ay. Taw wati zenday sajjahén róchán pa lápkasshokái raway o tai warák hák o danza bit.

¹⁵ Man taig o janénay nyámá, tai nasl o janénay naslay nyámá dozhmeni pédá kanán. Eshiay nasl tai saragá jant o taw áiay páday punzá janay.”

¹⁶ Hodáyá gón janéná gwasht: “Man tai chellagiay dardán sakk báza kanán, taw gón dard chokk pédá kanay. Tai wáhag pa wati mardá bit o á, tai sará wájahia kant.”

¹⁷ Hodáyá gón Ádamá gwasht: “Taw wati janay habar gósh dásht o hamá drachkay bar wárt ke man tará hokm dátagat ke cha eshiá mawar, paméshká tai sawabá zemin nálati ent. Taw wati zenday sajjahén róchán pa sakki o sóri cha zeminá wati waráká kasshay.

¹⁸ Zemin pa taw konthag o dhangara kárit o taw zeminay sabzagána waray.

¹⁹ Gón hédén péshánigé wati naganá waray tán hamá wahdá ke háká pera tarray, chéá ke cha hameshiá zurag butagay. Taw háké ay o padá háká pera tarray.”

²⁰ Ádamá wati janay nám Hawá kort, chéá ke á, sajjahén mardománi mát ent.

²¹ Hodáwandén Hodáyá, pa Ádam o áiay janá, cha póstá póshák jórh kort o gwará dátant.

²² Hodáwandén Hodáyá gwasht: “Nun ensán may payméné jórh butag o nék o badá zánt, chó mabit ke wati dastá shahár bedant o zenday drachkay bará bezurit o bwárt o tán abad zendag bebit.”

²³ Gorhá Hodáwandén Hodáyá á cha Adanay bágá dar kort ke zeminay sará kesht o keshár bekant, hamá zemin ke cha áiay háká á jórh kanag butagat.

²⁴ Ensánay gallénagá rand, pa zenday drachkay ráhay bandagá, Hodáyá Adanay bágay ródarátki némagá karrubi óshtáréntant o anchén ásgwárén zahmé ham éri kort ke har némagá chahria wárt.