Pédáesh 11 - Hodáay Pákén Ketáb Balochi zobáná

Bábelay borj

¹ Sajjahén donyáay zobán yakkén at o labz yakkén atant.

² Mardom ke cha ródarátká laddhetant, Shináray sardhagárá dashté distesh o hamódá jahmenend butant.

³ Gón yakdomiá gwashtesh: “Byá, heshta janén o sharriay sará pachénesh.” Áyán sengay jáhá hesht kára bast o gelay jáhá dhámbar.

⁴ Gwashtesh: “Byá pa wat shahré addha kanén, anchén borjé máni bebit ke sartholli ásmáná sar bebit, tánke pa wat námé ér bekanén ke sajjahén zeminay sará sheng o sháng mabén.”

⁵ Hodáwand ér átk tánke hamá shahr o borjá bechárit ke mardomi addh kanagá atant.

⁶ Hodáwandá gwasht: “Edá bechár, nun é yakkén ráj o kawm ant o sajjahénáni zobán yakk ent. Agan é káresh bendát kortag, cha ed o dém é harché kanag belóthant, pa eshán nabutenia nabit.

⁷ Byá, jahláda rawén o esháni zobáná garh o manja kanén ke é, yakdomiay habarán sarpad mabant.”

⁸ Hodáwandá, é mardom cha ódá sajjahén zeminay sará sheng o sháng kortant o eshán shahray addh kanagay kár band kort.

⁹ Paméshká á shahray nám Bábel but ke Hodáwandá ódá sajjahén donyáay yakkén zobán garh o manj kort. Áiá mardom cha ódá zortant o sajjahén zeminay sará sheng o sháng kortant.

Sámay nasl o padréch

¹⁰ Sámay nasl o padréchay kessah chosh ent: Tuppáná do sálá rand wahdé Sámay omr 100 sál at, cha áiá Arpakshád pédá but.

¹¹ Arpaksháday pédáeshá rand, Sámá 500 sál omr kort o áiá dega mardénchokk o janénchokk ham but.

¹² Arpaksháday omr 35 sál at ke cha áiá Shelah pédá but.

¹³ Shelahay pédáeshá rand, Arpakshádá 403 sál omr kort o áiá dega mardénchokk o janénchokk ham but.

¹⁴ Shelahay omr 30 sál at ke cha áiá Eber pédá but.

¹⁵ Eberay pédáeshá rand, Shelahá 403 sál omr kort o áiá dega mardénchokk o janénchokk ham but.

¹⁶ Eberay omr 34 sál at ke cha áiá Péleg pédá but.

¹⁷ Pélegay pédáeshá rand, Eberá 430 sál omr kort o áiá dega mardénchokk o janénchokk ham but.

¹⁸ Pélegay omr 30 sál at ke cha áiá Rahu pédá but.

¹⁹ Rahuay pédáeshá rand, Pélegá 209 sál omr kort o áiá dega mardénchokk o janénchokk ham but.

²⁰ Rahuay omr 32 sál at ke cha áiá Serug pédá but.

²¹ Serugay pédáeshá rand, Rahuá 207 sál omr kort o áiá dega mardénchokk o janénchokk ham but.

²² Serugay omr 30 sál at ke cha áiá Náhór pédá but.

²³ Náhóray pédáeshá rand, Serugá 200 sál omr kort o áiá dega mardénchokk o janénchokk ham but.

²⁴ Náhóray omr 29 sál at ke cha áiá Térá pédá but.

²⁵ Téráay pédáeshá rand, Náhórá 119 sál omr kort o áiá dega mardénchokk o janénchokk ham but.

²⁶ Téráay omr 70 sál but o randá cha áiá Ebrám o Náhór o Hárán pédá butant.

Téráay nasl o padréch

²⁷ Téráay nasl o padréchay kessah chosh ent: Cha Téráyá Ebrám o Náhór o Hárán pédá butant. Cha Háráná Lut pédá but.

²⁸ Háránay pet, Térá angat zendag at o Hárán mán Kaldániáni shahr Urá mort, hamódá ke pédá butagat.

²⁹ Ebrám o Náhór, doénán sur o sáng kort. Ebrámay lógiay nám Sárái at o Náhóray lógiay nám Melkah. Melkah, Háránay jenekk at o Hárán, Melkah o Yaskáhay pet.

³⁰ Sárái santh at o chokki néstat.

³¹ Téráyá wati chokk Ebrám o nomásag Lut, ke Háránay chokk at o wati neshár, bezán Ebrámay jan Sárái zortant o cha Kaldániáni shahr Urá dar átk. É sajjahén dém pa Kanhánay sardhagárá ráh geptant, bale wahdé Háránay shahrá rasetant, hamódá neshtant.

³² Téráyá do sad o panch sál omr kort o Háráná mort.