Mattá 9 - Hodáay Pákén Ketáb Balochi zobáná

Lang o mondhén mardéay drahbakshi

¹ Issá yakk bójigéá swár but, mazangwarmi gwázént o wati jenday shahrá átk.

² Hamé wahdá lahtén mardomá, tahtéay sará waptagén lang o mondhén mardé áiay kerrá áwort. Wahdé Issáyá áyáni setk o báwar dist, gón langá gwashti: “Oo mani chokk! Delá mazan kan, tai gonáh bakshag butant.”

³ Bale Sharyatay lahtén zánógerá wati delá gwasht: “É mard kopr kanagá ent.”

⁴ Issáyá áyáni delay hál o habar zántant o gwashti: “Shomá chéá wati delá palitén hayála kárét?

⁵ Kojám habaray gwashag ásánter ent: ‘Tai gonáh bakshag butagant,’ yá: ‘Pád á, beraw’?

⁶ Bale man paméshká é habar kort tán shomá bezánét, man ke Ensánay Chokk án, maná é donyáyá gonáháni pahell kanagay wák o ehtiár hast.” Padá gón á langá gwashti: “Pád á, wati taht o nepádán bezur o lógá beraw.”

⁷ Gorhá mard pád átk o lógá shot.

⁸ Wahdé mardomán é kár dist, torsetesh o Hodáesh satá kort o sárhát ke mardomi inchok wák o ehtiár dátagant.

Mattáay lóthag

⁹ Anchosh ke Issá ráhá rawagá at, Mattá námén mardé disti ke song o máliát geragay jágahá neshtagat. Gón áiá gwashti: “Byá, mani randgiriá bekan!” Mattá pád átk o áiay hamráh but.

¹⁰ Wahdé Issá Mattáay lógá parzónagay sará neshtagat o warák waragá at, bázén songi o máliátgir o radkár ham átk o waragá gón Issá o áiay moridán hamwán butant.

¹¹ Wahdé Parisián é dist gón Issáay moridán gwashtesh: “Chéá shomay wájah gón songi o gonahkárán waráka wárt?”

¹² Issáyá eshkot o gwashti: “Dráh o salámatén mardomán dáktar pakár naent, nádráhán dáktar pakár ent.”

¹³ Bale berawét o é habaray mánáyá dar begéjét ke man hayrát o korbánig kanagay lóthók naán, mehr o rahmatay lóthók án. Man pa pahrézkárán nayátkagán, gonahkáráni lóthag o gwánk janagá átkagán.

Róchagay bárawá

¹⁴ Randá, Yahyáay morid Issáay kerrá átkant o jostesh kort: “Má o Parisi róchaga dárén, bale tai morid chéá róchaga nadárant?”

¹⁵ Issáyá passaw dát: “Sálónk ke neshtag, sur o árósay mehmán sugia bant o porsa dárant? Bale anchén wahdé kayt ke sálónk cha áyán jetá kanaga bit, hamá wahdá róchaga dárant.

¹⁶ Hechkas cha nókén godéá chondhé naderrit o kwahnén pashká pacch o pinaga najant, chéá ke nókén goday pacch nazza kayt o kwahnén pashká géshtera derrit.

¹⁷ Hamé dhawlá, kwahnén zekkáni tahá nókén sharáb mána nakanant, agan chosh bekanant zekka derant o sharába rechant o zekk ham zawála bant. Nókén sharábá nókén zekkán mána kanant, tán sharáb o zekk, har doén bemánant.”

Janénéay drahbakshi o jenekkéay zendag kanag

¹⁸ Issá angat gón áyán habar kanagá at ke parasteshgáhay yakk masteré átk o áiay pádán kapt o gwashti: “Mani jenekk hamé annun mortag, bale byá wati dastá áiay sará per mosh, á padá zendaga bit.”

¹⁹ Issá pád átk o gón wati moridán áiay hamráh but.

²⁰ Hamódá yakk janéné hastat ke dwázdah sál at áiay hón band nabutagat. Á cha poshti némagá átk o Issáay kabáhay lambi dast jat.

²¹ Wati delá gwashagá at: “Agan Issáay kabáhá ham dast per bekanán, dráha bán.”

²² Issáyá chakk tarrént o gwashti: “Oo mani jenekk! Delá mazan kan, tai setk o báwará tará rakkéntag.” Hamá damáná janén dráh but.

²³ Wahdé Issá parasteshgáhay masteray lógá raset, lahtén mótk áróki dist o bázéné porsay sará zár o puhár ham kanagá at.

²⁴ Issáyá gwasht: “Dhanná berawét, jenekk namortag, bass wáb ent.” Bale mardom áiay habaráni sará kalág geragá atant.

²⁵ Wahdé Issáyá mardom cha lógá dhanná dar kortant, jenekkay dasti gept o jenekk pád átk.

²⁶ É hál, sajjahén damagá tálán but.

Do kóray drahbakshi

²⁷ Issá cha ódá ráh gept, ráhá do kór gwánk janán áiay randá kapt o gwashtesh: “Oo Dáud bádsháhay chokk! Tará may sará bazzag bát.”

²⁸ Anchosh ke Issá lógá raset, doén kór áiay kerrá átkant. Issáyá gón áyán gwasht: “Shomárá báwar ent ke man é kárá korta kanán?” Áyán jwáb dát: “Haw, oo Hodáwand!”

²⁹ Gorhá Issáyá wati dast áyáni chammáni sará per mosht o gwashti: “Hamá dhawlá ke shomá báwar kortag, gón shomá hamá dhawlá bebit.”

³⁰ Nun áyáni chamm rozhná butant. Issáyá kaddhan kort o gwashtant ke gón hechkasá é bárawá habar makanant.

³¹ Bale á shotant o Issáay námesh sajjahén damagá tálán kort.

Gongéay drahbakshi

³² Áyáni rawagá rand, yakk mardé Issáay kerrá áwortesh ke jennéá geptagat o gong at.

³³ Anchosh ke Issáyá jenn kasshet, gong habar kanagá lagget. Sajjahén mardom hayrán butant o gwashtesh: “Choshén kár hechbar Esráilá gendag nabutag.”

³⁴ Bale Parisián gwasht: “É, gón jennáni sardáray sarókiá jennána kasshit.”

Keshár o ronók

³⁵ Issá sajjahén shahr o métagána shot o kanisaháni tahá mardomi dars o sabakka dátant, Hodáay bádsháhiay mestági sheng o tálána kort o har paymén nádráhi o nezórián dur kanán at.

³⁶ Áiá ke mardománi mocchi distant áyáni sará bazzagi but, chéá ke á béshepánkén pasáni dhawlá, paréshán o béwas atant.

³⁷ Gón wati moridán gwashti: “Keshár báz ent bale ronók kamm.

³⁸ Paméshká gón kesháray wáhondá dazbandi bekanét o belóthét ke pa wati keshárán ronók dém bedant.”