Mattá 6 - Hodáay Pákén Ketáb Balochi zobáná

Delsetkén hayrát

¹ Hozzhár bét! Wati nékén kárán pa mardománi pésh dáragá makanét, chéá ke é dhawlá shomárá cha ásmáni Petay némagá hecch mozzé narasit.

² Wahdé chizzé hayráta kanay, gorhá jár majan o dhandhór makan. Doru o dopóstén mardom, kanisah o kuchah o damkáni tahá é dhawlá kanant tánke mardom áyán satá bekanant o besárháyant. Shomárá rásténa gwashán, mozzé ke áyán rasagi at, rasetesh.

³ Wahdé hayráté cha rástén dastá dayay, chappén dast sahig mabit,

⁴ tánke tai dátagén hayrát sarpósh o chérandari bebit. Gorhá tai ásmáni Pet, ke chérénána gendit, tai mozzá dant.

Dwá

⁵ Wahdé dwá kanét, gorhá doru o dopóstén mardománi dhawlá makanét, chéá ke áyán kanisaháni tahá o chárráháni sará óshtag o dwá kanag dósta bit, tánke mardom áyán begendant. Shomárá rásténa gwashán, mozzé ke áyán rasagi at, rasetesh.

⁶ Bale harwahd dwá kanay, wati lógá beraw, lógay dapá beband o cha wati ásmáni Petá, ke cha chammán chér o andém ent, dwá belóth, gorhá tai Pet, ke chérénána gendit, tai mozzá dant.

⁷ Wahdé dwá kanét, gorhá darkawmén mardománi dhawlá mopt o náhudagén habarán lés o pellés makanét, á hayála kanant ke cha lés o pellésá áyáni dwá gósh dáraga bit.

⁸ Áyáni paymá mabét, chéá ke shomay ásmáni Pet cha lóthagá pésar wata zánt ke shomárá ché garaz ent.

⁹ Shomá é dhawlá dwá belóthét: ‘Oo may Pet, ke borzén ásmáná ay! Tai nám sharapdár bát.

¹⁰ Tai bádsháhi byáyát. Tai wáhag o erádah zeminay sará ham hamá dhawlá sarjam bát ke ásmáná sarjama bit.

¹¹ May maróchigén rezk o rózigá maróchi márá beday.

¹² May gonáh o radián bebaksh, anchosh ke má wati sajjahén daynkár bakshetagant.

¹³ Márá ázmáesh o chakkásá dawr maday o cha Shaytáná berakkén.’

¹⁴ Chéá ke agan shomá mardománi gonáh o mayárán bebakshét, gorhá shomay ásmáni Pet shomay gonáh o mayárán ham bakshit,

¹⁵ bale agan shomá mardománi gonáh o mayárán mabakshét, gorhá shomay ásmáni Pet ham shomay gonáh o mayárána nabakshit.

Róchag

¹⁶ Wahdé róchaga bét, doru o dopóstén mardománi dhawlá wati démá tábán o gamnák makanét. Á wati ruá gimmorénant o munjá kanant tán mardom bezánant róchag ant. Shomárá rásténa gwashán, mozzé ke áyán rasagi at, rasetesh.

¹⁷ Bale wahdé róchaga bay, gorhá wati dém o ruá beshód o sará charp kan,

¹⁸ tánke mardom mazánant taw róchag ay, tahná tai ásmáni Pet ke chér o andém ent, hamá bezánt. Á wahdi tai ásmáni Pet ke chérandaria gendit tai mozzá dant.

Áyókén jahánay tóshag

¹⁹ É jaháná pa wat mál o maddhi mocch makanét, ke edá warók o ramézesha wárt o zanga gerant o dozzesha polant o barant.

²⁰ Pa wat ásmáná ganj o hazánag ambár bekanét ke ódá na warók o ramézesha wárt, na zanga gerant o na dozzesha polant o barant.

²¹ Tai del hamá jáhá rawt ke mál hamódá ent.

Jesm o jánay cherág

²² Chamm, jesm o jánay cherág ent. Agan tai chamm wassh o dráh ent, gorhá tai sajjahén jesm o ján rozhnága bit.

²³ Bale agan tai chamm nájórh ent, gorhá tai sajjahén jesm o ján tahára bit. Nun agan tai jesm o jánay rozhn wat tahárié bebit, gorhá á tahári chónén mazanén tahárié bit.

Ásudagén zend

²⁴ Hechkas pa do wájahá golámi korta nakant, yá gón yakkéá dozhmenia kant o domigi dósta bit, yá gón awaligá wapádára bit o cha á degará badia kayt. Shomá yakwahd o yakjáh Hodá o zarray golámiá korta nakanét.

²⁵ Paméshká shomárá gwashán ke pa wati zendá paréshán o deltaparkah mabét ke ‘ché bwarén o ché benóshén?’, na pa wati jesm o jáná ke ‘ché bepóshén?’. Zend cha waráká o jesm o ján cha pósháká géshtera nakarzit?

²⁶ Ásmánay báli morgán bechárét, na keshant o na ronant o na ambára kanant, bale angat shomay ásmáni Pet áyán warák o róziga dant. Shomay arzesh o kimmat cha áyán géshter naent?

²⁷ Kay gón pegr o hayáláni zórá wati zenday róchán yakk sáhaté ham gésh korta kant?

²⁸ Pa pocch o pósháká chéá paréshán ét? Gyábánay gol o polláni némagá delgósh kanét, chón rost o rodóma kanant. Na zahmaté kasshant o na résant o gwapant,

²⁹ bale shomárá gwashán ke Solaymán bádsháhá gón wati mazanén shán o shawkatá é polláni hamdróshomén póshák gwará nabutag.

³⁰ Oo kambáwarán! Wahdé Hodá gyábánay káhán é dhawlá zébá o brahdára kant ke maróchi hastant o bándá taruná sóchaga bant, gorhá shomárá che paymá sharterén pósháka nadant?

³¹ Paméshká paréshán o deltaparkah mabét o magwashét ke ‘bárén ché bwarén o ché benóshén?’ yá ‘ché bepóshén?’.

³² Donyáay sajjahén Hodánábáwarén mardom é chizzáni randá tachant, bale shomay ásmáni Peta zánt ke shomárá é chizz pakár ant.

³³ Cha har chizzá pésar, Hodáay bádsháhi o áiay rástén ráhay shóházá bebét, é sajjahén wat shomárá dayaga bant.

³⁴ Pa bándátigén róchá paréshán o pegrig mabét, chéá ke bándát, wati pegrá wata kant. Maróchigén janjál, pa maróchigá bass ant.