Mattá 4 - Hodáay Pákén Ketáb Balochi zobáná

Shaytán Issáyá chakkásit

¹ Randá, cha Pákén Ruhay rahshóniá Issá gyábáná shot tánke Shaytán áiá bechakkásit.

² Chell shap o chell róch róchag dáragá rand Issá shodig but.

³ Gorhá Shaytán pa áiay chakkásagá átk o gwashti: “Agan taw Hodáay Chokk ay, é sengán begwash nagan bebant.”

⁴ Issáyá passaw dát: “Pákén Ketábá nebisag butag: ‘Mardom tahná pa nán zendaga nabit, cha Hodáay zobánay sajjahén habaráni mannagá zendaga bit.’”

⁵ Padá Shaytáná Issá pákén shahrá bort o mazanén parasteshgáhay diwálay borzterén jágahá óshtárént o

⁶ gwashti: “Agan taw Hodáay Chokk ay gorhá watá cha edá jahlád dawr beday chéá ke nebisag butag: Hodá pa tai negahpániá wati préshtagán hokma kant o á, tará wati dastáni delá dárant tán tai pád dhókéá malaggit.”

⁷ Issáyá gwasht: “Haw, bale chosh ham nebisag butag: Wati Hodáwandén Hodáyá machakkás o ázmáesh makan.”

⁸ Nun Shaytáná yakk sakkén borzén kóhéay sará bort o cha ódá donyáay sajjahén bádsháhi o áyáni shán o shawkati pésh dáshtant o

⁹ gwashti: “Agan taw mani démá kóndhán bekapay o maná parastesh bekanay, man é sajjahénán tará dayán.”

¹⁰ Gorhá Issáyá gwasht: “Oo Shaytán! Cha mani démá gom bay! Pákén Ketábá nebisag butag: Wati Hodáwandén Hodáyá parastesh bekan o tahná hamáiay hezmatá bekan.”

¹¹ Nun Shaytáná á yalah dát o shot. Préshtag átkant o Issáay hezmatesh kort.

Issáay hezmatkáriay bongéj

¹² Wahdé Issá sahig but ke Yahyá dazgir kanag butag, gorhá Jalilá shot.

¹³ Náserahay shahri yalah dát o Kaparnáhumay shahrá jahmenend but. Kaparnáhum, Jalilay mazangwarmay kerrá, Zebulun o Naptáliay kabilaháni sardhagárá ent.

¹⁴ Paméshká é dhawl but ke Eshayá nabiay gwashten sarjam bebit:

¹⁵ Zebulun o Naptáliay sardhagár, gwarmay mazanráhay sará, Ordonay kawray á dastá, Jalilay hamá hand o hankén ke darkawm jahmenend ant,

¹⁶ hamá kawmá ke zendi taháriá gwastagat, mazanén rozhné dist o hamá molk o dhagár ke ódá mark sáhél at, óday jahmenendáni sará rozhnáiá sar jat.

¹⁷ Cha hamá wahdá, Issáyá é kolaw o paygámay rasénag bongéj kort. Gwashti: “Cha wati gonáhán pashómán bebét o tawbah bekanét, chéá ke ásmáni bádsháhi nazzikk ent.”

Issáay awali chárén morid

¹⁸ Wahdé Issá Jalilay mazangwarmay lambá gám janagá at, do bráti dist, yakké Shamun at ke pannámi Petros at o domi áiay brát Andriás at. Áyáni kár máhigiri at o á wahdá pa máhigiriá wati dám o máhórán gwarmá chér géjagá atant.

¹⁹ Issáyá gón áyán gwasht: “Byáét, mani randgiriá bekanét o man shomárá anchosha kanán ke máhig geragay badalá, mardománi delá shekár bekanét.”

²⁰ Áyán hamá damáná wati dám yalah dát o áiay hamráh butant.

²¹ Wahdé kammé démá shot, dega do brát, Ákub o Yuhannái distant ke Zebdiay chokk atant. Bójigay tahá gón wati pet Zebdiá neshtagatant o wati máhórán sráchag o sharr kanagá atant. Issáyá á lóthetant.

²² Áyán ham wati pet gón bójigá yalah dát o áiay hamráh butant.

Jalilay damagá, Issáay hezmatkári

²³ Issáyá sajjahén Jalilá tarr o garda kort. Áiá kanisaháni tahá mardom dars o sabakka dát, Hodáay bádsháhiay mestága rasént o mardom cha nájórhi o nádráhián jórh o dráha kortant.

²⁴ Sajjahén Suriahá áiay nám o tawár prosht o mardomán har dhawlén nájórh o nádráh, jenni, mergiay nádráh, lang o mondh Issáay kerrá áwortant o áiá dráha kortant.

²⁵ Jalil, Dekápulis, Urshalim, Yahudiah o Ordonay kawray á dastay hand o damagáni bázén mardomé átk o Issáay hamráh but.