Mattá 24 - Hodáay Pákén Ketáb Balochi zobáná

Mazanén parasteshgáhay wayráni

¹ Issá cha mazanén parasteshgáhá dar áyagá at ke morid átkant tán áiay delgósh o chamshánká pa parasteshgáhay jágah o márhiáni nedáragá betarrénant.

² Issáyá gón áyán gwasht: “É sajjahénán gendagá ét? Shomárá rásténa gwashán, yakk sengé ham domi sengay sará namánit, sajjahénána próshant o karójant.”

Goddhi zamánagay nesháni

³ Hamá wahdá ke Issá Zaytunay kóhay sará neshtagat, áiay morid pa halwat o ehwaté átkant o jostesh kort: “Begwash bárén, é prosht o prósh kadéna bit o tai bádsháhiay áyag o donyáay halásiay nesháni, ché ent?”

⁴ Issáyá passaw dátant: “Hozzhár bét kasé shomárá gomráh makant.

⁵ Chéá ke bázéné mani námá kayt o gwashit: ‘Man hamá Masih án’ o bázénéá gomráha kant.

⁶ Jangáni kukkárá eshkonét o áyáni hál o habar shomay góshána kapit bale matorsét o paréshán mabét. Allam é dhawlá bit, bale angat halásiay wahd nayátkag o pa sar narasetag.

⁷ Yakk kawmé dega kawméay sará o yakk hokumaté dega hokumatéay sará páda kayt. Bázén molk o jágahán kahta kapit o zeminchandha bit.

⁸ Bale é sajjahén, tahná zank o záyagay dardáni bendát ent.

⁹ Á wahdá shomárá gerant o sakki o sóriáni ámácha kanant o koshant ham o donyáay sajjahén kawm, mani námay sawabá cha shomá naprata kanant.

¹⁰ Gorhá bázéné poshtá kenzit o cha ráhá thagalit, yakké domiá dróhit o kast o kénaga kant.

¹¹ Bázén drógén paygambar jáha janant o bázénéá gomráha kanant.

¹² Cha gomráhi o náshariá, bázén mardománi nyámá mehr o dósti kamma bit.

¹³ Bale hamá ke tán áherá sakkiána saggit, á rakkit.

¹⁴ Hodáay bádsháhiay mestágay jár, sajjahén donyáyá janaga bit, tán pa sajjahén kawmán sháhedié bebit, gorhá donyáay halási sara rasit.

Torsnákén wahd o jáwar

¹⁵ Wahdé shomá á ‘palit o bérán kanókén bazzhnáká’ gendét, hamá ke Dányál nabiá áiay bárawá habar kortag ke á pákén jágahá óshtátag,” wánók bezánt o sharr sarpad bebit,

¹⁶ “hamá ke Yahudiahá ant dém pa kóhán betachant.

¹⁷ Hamá ke bán o bádgiray sará ent, wati ord o poténkáni zuragá jahlá ér makapit o lógá marawt o

¹⁸ hamá mardom ke dhagáráni sará kesht o keshárá ent, wati kabáhay zuragá per matarrit.

¹⁹ Á róchán, apsóz pa lápporr o chokmátén janénán.

²⁰ Dwá bekanét ke shomay tachag o dar rawag, zemestán yá Shabbatay róchá mabit.

²¹ Chéá ke hamá róchán, anchén gránén sakki o sórié kapit ke áiay mesál cha jahánay jórh bayagá tán é wahdá nayátkag o hechbar ham nayayt.

²² Agan á sakkiáni róch kamter kanag mabuténant, hecch mardomé narakketagat, bale pa gechén kortagénáni háterá, á róch kamter kanaga bant.

²³ Á wahdá, agan kasé shomárá begwashit: ‘Bechár, Masih edá ent’ yá ‘Bechár, ódá ent,’ báwar makanét.

²⁴ Chéá ke drógén Masih o drógén nabi jáha janant o mazanén nesháni o ajekkái pésha dárant. Wati sajjahén zórá janant ke gechén kortagénán ham gomráh bekanant.

²⁵ Man cha é jáwaráni bayagá pésar shomárá hál dátag.

²⁶ Gorhá, agan wahdé mardom shomárá begwashant: ‘Bechárét, gyábáná ent,’ ódá marawét, yá ke begwashant: ‘Lógay tahá ent,’ báwar makanét.

²⁷ Chéá ke Ensánay Chokk anchén gerókéay paymá kayt ke cha ródarátká beger tán rónendá shahma dant o gendaga bit.

²⁸ Har jáh ke mortagén sahdáréay jóna bit, ódá gittó o dhundhwárén morg moccha bant.

Issáay per tarrag

²⁹ Á rócháni sakki o sórián o rand, yakk anágat róch tahára bit, máha nadrapshit o máhekánia nabit, estár ham cha ásmáná kapant o ásmáni zór o wák, larzénaga bant.

³⁰ Á wahdá, Ensánay Chokkay nesháni ásmáná paddara bit o donyáay sajjahén kawma gendant ke Ensánay Chokk, gón mazanén wák o twán o shán o shawkaté jambaráni sará kayt o paddara bit, nun gréwant o mótka kárant.

³¹ Gón karnáay borzén tawárá wati préshtagán ráha dant ke áiay gechén kortagén mardomán, cha donyáay chárén kondhán, bezán cha zeminay hand o damagán tán ásmánay goddhi marz o simsarán, mocch o yakjáh bekanant.

³² Nun cha enjiray drachká dars o sabakk begerét, anchosh ke áiay thál narma bant o táka trokkant, gorhá zánét ke garmágay mósom nazzikk ent.

³³ Hamé dhawlá, wahdé é sajjahén chizzána gendét, wata zánét ke mani áyagay wahd nazzikk ent o darwázagay dapá rasetagán.

³⁴ Shomárá rásténa gwashán, tán é sajjahén jáwar mayáyant é nasl o padréch halása nabit.

³⁵ Zemin o ásmán gára bant, bale mani habar hechbar gár o zyána nabant.

Hozzhár o ágah bebét

³⁶ Hechkasa nazánt ke á róch o á sáhat kadéna rasit, na ásmánay préshtaga zánant o na chokk, tahná Peta zánt o bass.

³⁷ Hamá dhawlá ke Nuhay bárigá butag, Ensánay Chokkay áyagay róch ham anchosha bit.

³⁸ Chéá ke cha hár o tuppáná pésar, tán hamá róchá ke Nuh bójigá swár but, mardomán wártag o nóshetag o sáng o sur kortag.

³⁹ Á hecch sahig naatant tán hár o tuppán átk o sajjahén mardomi gár o hármal kortant. Ensánay Chokkay áyagay wahdá ham hamé dhawlá bit.

⁴⁰ Á wahdá, do mardom kesháráni sará kárá bit, yakké baraga bit o domi hamódá pasht géjaga bit.

⁴¹ Do janén jenteray sará dánay droshagá bit, yakké baraga bit o domi hamódá pasht géjaga bit.

⁴² Shomá nazánét ke shomay Hodáwand kojám róchá kayt. Paméshká sár o hozzhár bét.

⁴³ Shomá sharra zánét, agan lógay hodábondá bezántén ke dozz shapay kojám wahd o pásá kayt, gorhá ágah butagat o dozzi wati lógá pa dozziá naeshtagat.

⁴⁴ Hamé paymá tayár bét, chéá ke Ensánay Chokk anchén wahdéá kayt ke shomá áiay entezár o wadárá nabét.

⁴⁵ Kay ent hamá wapádár o shiwwárén hezmatkár ke hodábond áiá wati é dega sajjahén hezmatkáráni master bekant tán áyán pa wahd ward o warák bedant.

⁴⁶ Bahtáwar ent hamá hezmatkár ke wahdé hodábonda kayt, áiá hamá káráni sará gendit.

⁴⁷ Shomárá rásténa gwashán, hodábond hamá hezmatkárá wati sajjahén mál o hastiay kármastera kant.

⁴⁸ Bale agan hezmatkár gandag o radkáré bebit o wati delá begwashit ke ‘hodábond áyagá déra kant’ o

⁴⁹ paméshká wati hamkáráni latth o kotth kanagá bongéj bekant o gón sharábián ward o nóshá bebit,

⁵⁰ áiay hodábond anchén róch o sáhatéá kayt o rasit ke á nazánt o wadárá naent.

⁵¹ Gorhá hodábond áiá thokkor thokkora kant o shatalkáráni nyámá dawra dant. Ódá gréwant o dantán pa dantána droshant.