Mattá 17 - Hodáay Pákén Ketáb Balochi zobáná

Issáay dém o dróshomay drapshnáki

¹ Shash róchá rand, Issáyá Petros, Ákub o áiay brát Yuhanná, hamráh kortant o yakk borzén kóhéay sará bortant ke ódá dega kass mabit.

² Ódá áyáni démá Issáay chehrag o dróshom badal but. Áiay dém róchay dhawlá drapshnák but o god o pósháki, espét espét butant.

³ Hamá wahdá áyáni démá Mussá o Elyás záher butant o gón Issáyá habar kanagá laggetant.

⁴ Petrosá gón Issáyá gwasht: “Oo Hodáwand! May edá bayag sakk sharr ent, agan tai razá bebit hamedá say sáheg o kápára bandén, yakké pa taw, yakké pa Mussá o degaré pa Elyásá.”

⁵ Hamé wahdá ke angat á habará at, drapshókén jambaréá áyáni sará sáheg kort o cha jambará tawáré átk o gwashti: “É mani dóstén Bacch ent, cha eshiá man báz wassh o razá án, eshiay habarán gósh bedárét.”

⁶ Wahdé moridán é tawár eshkot, sakk torsetesh o dém pa chér kaptant.

⁷ Bale Issá démá átk, dasti per kortant o gwashti: “Pád áét, matorsét!”

⁸ Wahdé áyán chamm pach kortant o cháret, abéd cha Issáyá dega hechkasesh nadist.

⁹ Cha kóhá ér kapagay wahdá Issáyá hokm kortant: “Tán hamá wahdá ke Ensánay Chokká cha mordagán jáh najatag, wati é distagénáni bárawá hechkasá hál madayét.”

¹⁰ Moridán jost kort: “Sharyatay zánóger chéá gwashant ke cha Masihay áyagá pésar, báyad ent Elyás nabi byayt?”

¹¹ Passawi dát: “Elyása kayt o sajjahén kárán gwam o géga kant.

¹² Bale mana gwashán, Elyás wa átkag, áyán pajjáh nayáwort o harché ke áyáni delá lóthet, gón áiá hamá dhawlesh kort. Hamé dábá Ensánay Chokká ham cha áyáni dastá sakki o sóri saggagi ent.”

¹³ Nun moridán zánt ke á pákshódókén Yahyáay bárawá habar kanagá ent.

Jenni bachakkéay drahbakshi

¹⁴ Wahdé Issá o sayén morid mardománi mocchiay nazzikká átkant, yakk mardé Issáay démá átk, kóndhán kapt o gwashti:

¹⁵ “Oo wájah! Tará mani bachakkay sará bazzag bát, áiá mergiay nádráhi gón ent o sakk azáb o bazzagia kant, bázén baré ásá kapit o báz bará ápá.

¹⁶ Man tai moridáni kerrá áwort, bale áyán dráh kort nakort.”

¹⁷ Issáyá gwasht: “Oo bébáwar o gomráhén nasl o padréch! Man tán kadéná gón shomá bemánán? Tán chinchok wahdá shomárá besaggán? Chokká edá mani kerrá byárét.”

¹⁸ Issáyá jenn hakkal dát, jenn dar átk o bachakk hamá damáná dráh but.

¹⁹ Randá morid halwatá Issáay gwará átkant o cha áiá jostesh kort: “Má chéá á jenn kasshet nakort?”

²⁰ Issáyá passaw dát: “Shomay kambáwariay sawabá. Shomárá rásténa gwashán, agan shomay báwar arzonéay kesásá ham bebit, shomá é kóhá gwashta kanét ke ‘cha edá bekenz o ódá beraw,’ kóha kenzit. Hecch chizz pa shomá nabuteni naent.

²¹ Bale é dhawlén jenn, abéd cha dwá kanag o róchag dáragá dara nayáyant.”

Issáay markay domi péshgói

²² Wahdé Jalilá yakjáh butant, Issáyá gón áyán gwasht: “Ensánay Chokk dróhaga bit o anchén mardománi dastá dayaga bit

²³ ke áiá koshant, bale sayomi róchá á zendaga bit o jáha jant.” Cha é habarán, áiay morid báz paréshán o deltaparkah butant.

Mazanén parasteshgáhay song o máliát

²⁴ Wahdé Issá o áiay morid Kaparnáhumá rasetant, gorhá mazanén parasteshgáhay songi o máliátgir Petrosay kerrá átkant o jostesh kort: “Tai ostád mazanén parasteshgáhay songá nadant?”

²⁵ Passawi dát: “Haw, dant.” Wahdé Petros lógá átk, Issáyá cha áiá pésar hamé jost kort ke “Oo Shamun! Donyáay bádsháh cha kayá song o máliáta gerant? Cha wati chokkán yá cha degarán?”

²⁶ Passawi tarrént: “Cha degarán.” Issáyá gwasht: “Gorhá chokk bakshaga bant.

²⁷ Bale pa áyáni naranjénagá, mazangwarmay tayábá beraw o nahigé ápá dawr beday, hamá máhig ke pésará nahigá jant, áiay dapá pach kan, taw yakk chárkaldári zarré genday, hamáiá bezur, manig o wati songá porr kan.”