Mattá 14 - Hodáay Pákén Ketáb Balochi zobáná

Pákshódókén Yahyáay koshag

¹ Á wahdá Jalilay hákem Hirudis, Issáay nám o tawárá sahig but.

² Áiá gón wati hezmatkárán gwasht: “É hamá pákshódókén Yahyá ent ke cha mordagán zendag butag, paméshká choshén ajekkái o mójezahána kant.”

³ Chosh at ke Hirudisá Hirudiáay sawabá ke pésará áiay brát Piliposay jan at, Yahyá geráéntag o bandijáhá band kortagat.

⁴ Chéá ke Yahyáyá gón Hirudisá gwashtagat: “Hirudiáay wati lógi kanag Sharyatá pa taw rawá naent.”

⁵ Hirudisá pa Yahyáay kóshárénagá shawr kortagat bale torseti, chéá ke mardománi báwar at Yahyá paygambaré.

⁶ Hirudisay sálgerah but o Hirudiáay jenekká mehmánáni démá nách o sohbat gept. Hirudis báz washdel but,

⁷ sawgendi wárt o labzi kort ke “Harché lóthay belóth, pa taw bakshaga bit.”

⁸ Jenekká wati mátay shawr o saláhay sará gwasht: “Pákshódókén Yahyáay sará hamedá tabakéay tahá bekan o maná beday.”

⁹ Hirudis báz paréshán o deltaparkah but bale mehmánáni démá sawgendi wártagat o jenekki labz dátagat, paméshká parmáni kort áiay é wáhagá barjáh bekanant.

¹⁰ É dhawlá, Yahyáay sari bandijáhá borráént.

¹¹ Gorhá áiay sar tabakéay tahá árag o jenekká dayag but, áiá wati mátay kerrá bort.

¹² Yahyáay morid átkant o áiay jónesh bort, kabr o kapaná rand, shot o Issáesh sahig kort.

Panch hazár mardomá warák dayag

¹³ É habaray eshkonagá rand, Issá bójigéá swár but o dur o gestáén jáhéá tahnaká shot. Wahdé mardom sahig butant, cha shahrán payádaká áiay randá gón kaptant.

¹⁴ Issá ke cha bójigá ér kapt o mardománi mazanén mocchii dist, áyáni sará bazzagi but o sajjahén nádráhi dráh kortant.

¹⁵ Bégáhá, morid áiay kerrá átkant o gwashtesh: “É, dur o gestáén jágahé o béwahd ham butag, paméshká mardomán bell ke métag o bázárán berawant o pa wat ward o waráké bahá begerant.”

¹⁶ Bale Issáyá gwasht: “Áyán rawagay zalurat nést, shomá wat áyán warák bedayét.”

¹⁷ Gwashtesh: “Edá may kerrá tahná panch nán o do máhig hast.”

¹⁸ Gwashti: “Harché shomárá gón, mani kerrá byárét.”

¹⁹ Gorhá áiá mardom sabzagén káháni sará nendagay parmán dátant, randá panchén nán o doén máhigi zortant, ásmánay némagá cháreti o Hodáay shogri gept, gorhá náni chondh chondh kort o moridáni dastá dátant. Moridán nán mardománi sará bahr kortant.

²⁰ Sajjahén mardomán tán sérá wárt o moridán angat cha sar átkagén chondhán, dwázdah sapt porr kort.

²¹ Janén o chokkán o abéd, kesás panch hazár mardén atant. Sajjahénán sérá wárt.

Issá ápay sará gáma jant

²² Issáyá hamá damáná morid parmán dát o gwashtant: “Tánke man é mardomán roksata kanán, shomá bójigá swár bét o cha man pésar gwarmay domi némagá berawét.”

²³ Mardománi rahádag kanagá rand, pa dwá kanagá tahná kóhay sará sar kapt. Rónend at o á wat tahná at.

²⁴ Á wahdá, bójig cha tayábá dur rasetagat, trond o tézén gwát o mastén mawj o chawláni ámách at.

²⁵ Shapay cháromi pásá, Issá ápay sará gám janán dém pa áyán pédák at.

²⁶ Wahdé moridán Issá ápay sará gám janán dist, sakk torset o gwashtesh balkén ruhé, paméshká cha torsá kukkáresh kort.

²⁷ Bale Issáyá hamá damáná gón áyán gwasht: “Matorsét, é man án.”

²⁸ Petrosá gwasht: “Oo Hodáwand! Agan é taw ay, gorhá bell ke man ham ápay sará tai kerrá káyán.”

²⁹ Issáyá gwasht: “Byá!” Gorhá Petros cha bójigá gwarmá ér átk o ápay sará Issáay némagá rawagá lagget.

³⁰ Bale cha gwátay trondiá torseti o ér boddhagá lagget, gorhá kukkári kort: “Oo Hodáwand! Maná berakkén.”

³¹ Hamá damáná Issáyá dast shahár dát, á gept o gwashti: “Oo kambáwar! Chéá shakket kort?”

³² Bójigá sar kaptant o gwát kapt o árám but.

³³ Hamá ke bójigá neshtagatant, Issáesh satá o saná kanáná gwasht: “Béshakk taw Hodáay Chokk ay.”

Nádráháni drahbakshi

³⁴ Wahdé áyán gwarm gwázént Genisáretay shahrá ér átkant.

³⁵ Óday mardomán Issá pajjáh áwort, sajjahén hand o damagay á dega mardomesh sahig kortant o sajjahén nádráhesh áiay kerrá áwortant.

³⁶ Dazbandiesha kort: “Bell má tai kabáhay lambá dast bejanén o bass.” Áyán ke dasta jat, sajjahén wassh o dráha butant.