Mattá 1 - Hodáay Pákén Ketáb Balochi zobáná

Issáay béh o bonyát

¹ Issá Masih, Dáud o Ebráhémay chokk ent. Áiay béh o bonyátay daptar é dhawlá ent:

² Esáke Ebráhém, Ákube Esák, Yahudá o áiay brát ke Ákubay chokk atant.

³ Páres o Zárahe Yahudá ke áyáni mátay nám Támár at. Hesrune Páres, Arame Hesrun,

⁴ Aminádábe Aram, Nahshune Aminádáb, Salmune Nahshun,

⁵ Buáze Salmun ke áiay mátay nám Raháb at, Óbayde Buáz ke mátay námi Rut at, Yassie Óbayd,

⁶ bádsháh Dáude Yassi. Solaymáne Dáud, ke máti pésará Uriáay lógi butagat,

⁷ Rehóbáme Solaymán, Abiáe Rehóbám, Ásáe Abiá,

⁸ Yehushápáte Ásá, Yuráme Yehushápát, Ozziáe Yurám,

⁹ Yutáme Ozziá, Áháze Yutám, Hezekiáe Áház,

¹⁰ Manasie Hezekiá, Ámune Manasi, Yusiáe Ámun,

¹¹ Yekuniáe Yusiá o áiay sajjahén brát, ke é wahdá Yahudi Bábelá darándhéh butant.

¹² Cha Bábelay darándhéhiá rand, Shiáltiále Yekuniá, Zerubábele Shiáltiál,

¹³ Abihude Zerubábel, Elyákime Abihud, Ázure Elyákim,

¹⁴ Saduke Ázur, Ákime Saduk, Elihude Ákim,

¹⁵ Eliázare Elihud, Mattáne Eliázar, Ákube Mattán,

¹⁶ Issope Ákub ke Maryamay mard at. Cha Maryamá Issá pédá but ke Masih zánaga bit.

¹⁷ É dhawlá, cha Ebráhémá beger tán Dáudá chárdah posht o cha Dáudá beger tán Yahudiáni Bábelay darándhéhiá dega chárdah posht o cha á darándhéhiá beger tán Issá Masihá ham chárdah posht ant.

Issá Masihay pédáesh

¹⁸ Issá Masihay pédáesh é dhawlá at: Issáay mát Maryam, Issopá sáng kortagat bale cha áyáni sur o árósá pésar, zántesh ke cha Hodáay Pákén Ruhá, áiay láp porr butag.

¹⁹ Maryamay lógwájah Issop, rást o pahrézkárén mardomé at, nalótheti Maryamá bannám bekant, paméshká wati delá shawri kort: “Pa bétawári é sángá bepróshán.”

²⁰ É bárawá angat pegr kanagá at ke áiay wábá anágat Hodáwanday préshtagé átk o gwashti: “Issop, oo Dáud bádsháhay chokk! Cha wati deshtár Maryamay zurag o lógá baragá mators, chéá ke áiá é lápporri, cha Pákén Ruhá rasetag.

²¹ Á, mardénchokkéay sará chellaga bit o áiay námá Issá bekan, chéá ke á wati kawmá cha áyáni gonáhána rakkénit.”

²² É sajjahén kár paméshká chosh butant tán Hodáwanday hamá habar rást o paddar bebant ke áiá cha nabiay zobáná gwashtagant:

²³ Neshtagén janénchokkéay láp porra bit o mardénchokkéay sará chellaga bit o áiay námá Emánuil pera bandant, ke eshiay máná “Hodá gón má” ent.

²⁴ Wahdé Issop cha wábá ágah but, hamá dhawlá ke Hodáwanday préshtagá hokm dátagat, wati jani zort,

²⁵ bale tán á wahdá ke chokk pédá nabutagat, gón áiá wapt o wábi nakort o chokkay námi Issá per bast.